आजदेखि चन्द्रागिरिमा मातातीर्थ मेला प्रारम्भ

समाज

गृहपृष्ठ
समाज

आजदेखि चन्द्रागिरिमा मातातीर्थ मेला प्रारम्भ

choicekhabar मंगलबार, वैशाख २५, २०८१

काठमाडौं– वैशाख कृष्ण पक्ष औँशी अर्थात आमाको मुख हेर्ने औँशीका दिन काठमाडौंको चन्द्रागिरिस्थित मातातीर्थ मन्दिरमा लाग्ने मेला मंगलवारदेखि प्रारम्भ भएको छ । यो वर्ष भोलि वैशाख २६ गते बुधवार मातातीर्थ औँशी मनाइँदै छ ।

मातातीर्थ संरक्षण तथा विकास संस्थाका अध्यक्ष शान्त उदासका अन्ुसार मातातीर्थ मेलाको सम्पूर्ण तयारी सोमवार नै पुरा भएर आजदेखि मेला प्रारम्भ भएको हो । उदासले मेलालाई सफलतापूर्वक सञ्चालन गर्नका लागि मूल समिति, बजार व्यवस्थापन उपसमिति, स्वास्थ्य उपसमिति, पार्किङ व्यवस्थापन उपसमिति, ज्येष्ठ नागरिक दर्शन उपसमिति गठन गरी काम गरिएको बताए ।

मातातीर्थ मेलामा आज साँझ बत्ती बाल्ने तथा बत्ती बालेको भोलिपल्ट औँशीका दिन आमाको मुख हेर्ने तथा स्नान गर्ने परम्परा छ । त्यसैले अघिल्लो दिनदेखि उक्त क्षेत्रमा मेला लाग्ने गर्छ । सांस्कृतिक, धार्मिक, ऐतिहासिक तथा पुरातात्विक महत्वको मातातीर्थ कुण्डमा हरेक वर्ष श्राद्ध गर्नेको सङ्ख्या बढ्दै गएको मन्दिरका पुजारी फणिन्द्र अधिकारीको भनाइ छ । अधिकारीका अनुसार उक्त कुण्डमा आठदेखि १० जना श्राद्ध गर्नका लागि आउँछन् ।

दिवङ्गत आमाको सम्झनामा श्राद्ध तथा दान गर्न आउनेले गर्दा ठूलो मेला लाग्ने गरेको हो । उनीहरुले मातातीर्थ कुण्डमा स्नान र पूजा गर्छन् । मातातीर्थ कुण्डमा दर्शन गरेमा छोराछोरीले दिवङ्गत आमालाई तिर्नुपर्ने ऋणबाट मुक्त हुने विश्वास गरिन्छ ।

मातातीर्थ क्षेत्रको एकीकृत विकासका लागि फनपार्क, पिकनिक स्पट तथा कुण्डभन्दा आठ मिटरमाथि आमाको स्वर्गद्वारी निर्माणको काम समितिले अगाडि बढाएको छ । समितिले स्वर्गद्वारी क्षेत्रमा एक सय १३ फिटको ढुङ्गाको मूर्ति निर्माण गर्दैछ ।

मातातीर्थ क्षेत्रमा असार, साउन र भदौ महिनामा अत्यधिक पानी हुने र चैत, वैशाख, जेठमा पानी सुक्ने भएकाले पानी व्यवस्थापनका लागि रिजर्भ ट्याङ्की निर्माण गर्नेबारे छलफल भइरहेको छ ।

प्रकाशित मिति: मंगलबार, वैशाख २५, २०८१ ११:३९

प्रतिक्रिया दिनुहोस्