मधेशका चार जिल्लामा सहकारीको बदमासी,पर्साका ८५ सहित४७२ सम्पर्क बिहिन

अर्थ

गृहपृष्ठ
अर्थ

मधेशका चार जिल्लामा सहकारीको बदमासी,पर्साका ८५ सहित४७२ सम्पर्क बिहिन

choicekhabar शुक्रबार, जेठ १८, २०८१

मधेस प्रदेशका पर्सा, बारासहित चार वटा जिल्लाका ४ सय ७२ वटा सहकारी संस्थाहरु सम्पर्कविहीन भएका छन् ।पर्सा,बारा,, रौतहट र सर्लाही गरी ४ जिल्लाका ४ सय ७२ सहकारी सम्पर्कविहीन भएका हुन् ।

मधेस प्रदेशको भूमि व्यवस्था, कृषि तथा सहकारी मन्त्रालयले दिएको जानकारी अनुसार यी चार जिल्लमा मात्रै उक्त संख्या बराबरको सहकारी संस्थाहरु हालसम्म सम्पर्कविहीन भएका छन् । जसमा सबैभन्दा बढी सर्लाहीको जिल्लाको एक सय ९२ वटा सहकारीहरु सम्पर्कविहीन रहेको मन्त्रालयले जानकारी दिएको छ ।

यस्तै, बाराका एक सय १२ वटा , पर्साका ८५ वटा र रौतहटका ८३ वटा सहकारीहरु सम्पर्कविहीन रहेका छन् । मन्त्रालयका सहकारी विभागका अधिकृत सुनिल थापाका अनुसार यी सहकारीहरु नियमित रुपमा ताकेता गर्दापनि मन्त्रालयमा सम्पर्कमा नआएको, कोपोमिस प्रणालीमा आबद्ध नभएका र केही सहकारी संस्थाहरुसँग सम्पर्कसमेत स्थापित गर्न नसकिएको बताएका छन् ।

मन्त्रालयले पहिलो पटक ०८० साल चैत १८ गते नै ३५ दिने सूचना जारी गरी प्रदेशमा रहेका सहकारी संस्थाहरुलाई मन्त्रालयको सम्पर्कमा आउन आग्रह गरेको थियो । अहिले बिहीबार फेरि अर्को सूचना जारी गरी बारा, पर्सा, रौतहट र सर्लाही गरी ४ जिल्लाका सहकारीहरुलाई सम्पर्कमा आउन ३५ दिने सूचनामार्फत् आग्रह गरेको छ ।

सूचनामार्फत् यस अवधिमा सम्पर्कमा नआउने सहकारी संघ संस्थाहरुलाई मधेस प्रदेश सहकारी ऐन,२०७९ तथा नियमावली २०८० बमोजिम कारवाही प्रक्रियाअघि बढाउने ब्योवहोरासमेत अघि बढाउने चेतावनी दिइएको छ ।

यसअघि मन्त्रालयले मधेसका ८ जिल्लामध्ये महोत्तरी, धनुषा, सिराहा र सप्तरीका गरी ३१० सहकारीलाई सम्पर्कमा आउन सूचना जारी गरेको थियो । तर,तीमध्ये ६० वटा मात्रै सहकारी आवश्यक कागजातसहित सम्पर्कमा आएका थिए ।

मन्त्रालयले ती सहकारीलाई पुनः १५ दिनको समय दिएर सम्पर्कमा आउन भनेको छ, साथै सम्पर्कमा नआएमा आवश्यक कारबाही गरिने समेत चेतावनी दिएको छ । मधेस प्रदेशमा रहेका आठ वटा जिल्लाहरुमा पछिल्लो समय सहकारी संस्थाहरुले बचतकार्ताको रकम लिएर फरार हुने, बचतकर्ताको बचत फिर्ता नगर्ने, सहकारीको रकम हिनामिना गर्ने लगायतका समस्याहरु बढदै गएको छ । जसका कारण यहाँ सर्बसाधारणहरु जिल्ला प्रशासन, जिल्ला प्रहरीमा आफ्नो रकम फिर्ताको लागि उजुरी लिएर पुग्ने गरेका छन ।

प्रकाशित मिति: शुक्रबार, जेठ १८, २०८१ १७:३७

प्रतिक्रिया दिनुहोस्