काठमाडौं– भारतमा लोकसभा निर्वाचनको मतगणना जारी छ । यस पटकको निर्वाचनमा भारतीय सिनेमा क्षेत्रमा पनि चर्चा छ ।
बलिउडका कैयौँ नाम चलेका कलाकारहरु यस पटक निर्वाचनको मैदानमा उत्रिएका छन् । कंगना रनौत, अरुण गोविल ‘भीआईपी’ क्षेत्रबाट निर्वाचन लडेका छन् । कंगना मन्डीबाट र अरुण मेरठबाट उम्मेदवार छन् ।
बलिउड अभिनेत्री हेमा मालिनी मथुराबाट, शत्रुघ्न सिन्हा आसनसोलबाट, मनोज तिवारी उत्तर पूर्वी दिल्लीबाट, रवि किशन गोरखपुरबाट, दिनेशलाल यादव ‘निरहुआ’ आजमगढ क्षेत्रबाट निर्वाचनमा उठेका छन् ।
यस्तै, पवन सिंह काराकाटबाट र मलयालम स्टार सुरेश गोपी केरलको त्रिस्सुर निर्वाचन क्षेत्रबाट चुनावी मैदानमा उत्रिएका छन् । यी सबै स्टार कलाकारको भाग्यको फैसला केही समयमै लाग्ने देखिन्छ ।
राज बब्बर गुडगांवमा अगाडि
कांग्रेसका राज बब्बर गुडगांव क्षेत्रमा लिड गरिरहेका छन् । उनी ४३ हजार १८१ मतले निकटतम् प्रतिष्पर्धीभन्दा अगाडि छन् । राजको प्रतिष्पर्धा भारतीय जनता पार्टी (भाजपा) का राव इन्द्रजीत सिंहसँग छ ।
निरहुआ–पवन सिंह पछाडि
भोजपुरी स्टार पवन सिंह र दिनेशलाल यादव ‘निरहुआ’ मतगणनाको सुरुवाती रुझानमा पछाडि देखिएका छन् । काराकाट निर्वाचन क्षेत्रबाट चुनाव लडेका पवन सिंह ३ हजार २८० र उत्तर प्रदेशको आजमगढ क्षेत्रबाट चुनावी प्रतिष्पर्धामा रहेका निरहुआ ६ हजार २९४ मतले पछाडि छन् ।
मन्डीमा विजयतर्फ बढ्दै कंगना
मन्डी निर्वाचन क्षेत्रमा अभिनेत्री कंगना रनौत विजयी हुने सुरुवाती नतिजाको रुझानले देखाएको छ । सत्तारुढ भाजपाबाट चुनावी प्रतिष्पर्धामा उत्रिएकी अभिनेत्री कंगना २० हजार मतले अगाडि छिन् ।
अभिनेता अरुण गोविल मेरठमा झण्डै १० हजार मतले अग्रस्थानमा छन् । अभिनेत्री हेमा मालिनी मथुरा क्षेत्रमा ३४ हजार ७४८ मतले अगाडि छिन् ।
भारतीय संसदको तल्लो सदन लोकसभाका ५४३ सदस्यको चुनावका लागि अप्रिल १९ देखि जुन १ सम्म मतदान भएको थियो ।
केन्द्रमा सरकार बनाउनका लागि भारतीय जनता पार्टी (भाजना) को नेतृत्वमा राष्ट्रिय जनतान्त्रिक गठबन्धन (एनडीए) र विपक्षी भारतीय राष्ट्रिय कांग्रेसको नेतृत्वमा इन्डियन नेशनल डेभलपमेन्टल इन्क्लुसिव अलाइन्स (आईएनडीआईए) गठबन्धनबीच मुख्य प्रतिष्पर्धा छ ।
