भरतपुर। चितवनको भरतपुर महानगरपालिकाले आर्थिक वर्ष २०८१र०८२ का लागि ६ अर्ब ५५ करोड ८५ लाख ९८ हजार रूपैयाँको बजेट सार्वजनिक गरेको छ ।
महानगरपालिकाको नगरसभा तथा १५औं अधिवेशनमा उपमेयर चित्रसेन अधिकारीले बजेट पेश गरेका हुन् । यो बजेट चालू आर्थिक वर्षको भन्दा २४ करोड ६ लाख ८ हजार रूपैयाँ बढी हो । कुल बजेटमा एक अर्ब ८० करोड रूपैयाँ आन्तरिक आय हुने अनुमान छ ।
प्रस्तुत बजेटमा अन्तरसरकारी वित्तीय हस्तान्तरणबाट २ अर्ब ४ करोड ६३ लाख ३१ हजार, संघ राजस्व बाँडफाँडबाट ३२ करोड ४७ लाख तथा बागमती प्रदेश सरकारको राजस्व बाँडफाँटबाट २५ करोड ७५ लाख ६७ हजार गरी जम्मा ५८ करोड २२ लाख ६७ हजार, जनसहभागितारश्रमदानबाट ५० करोड, बैंक मौज्दात १ अर्ब ६० करोड, सडक बोर्ड नेपालबाट ३ करोड रहने प्रक्षेपण गरिएको छ ।
चालू आवमा बन्न नसकेका तथा भुक्तानी बाँकी रहेका र क्रमागत एवं बहुवर्षीय ठेक्का भएका योजना समयमै सम्पन्न गर्न १ अर्ब ६० करोड छुट्याइएको छ ।
हरेक वडाको सन्तुलित विकासका लागि दुई प्रकारबाट वडास्तरीय सिलिङ निर्धारण गरिएको उपमेयर अधिकारीले बताए । वडालाई न्यूनतम २ करोड ७४ लाख २८ हजार र अधिकतम २ करोड ९० लाख २ हजार गरी जम्मा वडास्तरीय आयोजनामा ८२ करोड विनियोजन गरिएको छ ।
महानगरका ठूला तथा रणनीतिक महत्व तथा गौरवका पूर्वाधार निर्माण गर्न एवं संघीय र बागमती प्रदेश सकारबाट प्रस्ताव भएका समपूरक र विशेष अनुदान अन्तर्गतका योजनाहरुको कार्यान्वयन गर्नको लागि समपुरक साझेदारी कोष स्थापना गरी कार्यान्वयनमा ल्याउन १२ करोड विनियोजन गरिएको छ ।
सार्वजनिक शौचालयहरू निर्माण, फाउण्डेसनसहितको मेसजाली निर्माण, हरियालीसहितको नमूना सडक निर्माण, सिचाइ, कल्भर्ट, ग्राभेल, ह्युमपाइप खरिद, एक वडा, एक खुला व्यायमशालाको लगायतका शहरी सौन्दर्य र भूउपयोग तथा वस्ती विकाससम्बन्धी कार्यक्रम कार्यान्वयन गर्न १४ करोड छुट्याइएको छ ।
दियालो बङ्गलामा पार्कसहित पर्यटकीय पूर्वाधार बनाई संग्रहालय चलाउन १ करोड छुट्याइएको छ । वैदेशिक रोजगारबाट फर्केकाहरूलाई कृषि पेशातर्फ आकर्षित गर्नका लागि व्यवसायिक खेती गर्न कृषि उपकरण खरिदमा अनुदान, कृषि तथा पशु बीमा कार्यक्रमलाई निरन्तरता, कृषकको क्षमता अभिवृद्धि गर्ने तथा प्रविधि हस्तान्तरणका कार्यक्रम सञ्चालन लगायतका कृषि सम्बन्धी नीति तथा कार्यक्रम कार्यान्वयन गर्नको लागि ६ करोड विनियोजन गरिएको छ ।
दूध उत्पादनमा दिइँदै आएको उत्पादनमा आधारित प्रतिलिटर ३ रूपैयाँ अनुदान कार्यक्रमलाई निरन्तरता, पशु बीमा कार्यक्रम सञ्चालन, मत्स्यफर्महरूमा प्रयोग हुने विद्युत् महसुलमा पचास प्रतिशत अनुदान निरन्तरता लगायत पशुविकास कार्यक्रम कार्यान्वयन गर्न ७ करोड बजेट विनियोजन गरिएको छ ।
नीति तथा कार्यक्रम प्रस्तुत गर्दै मेयर रेनु दाहालले महानगरमा एक घर दुई रुख अनिवार्य गरेको बताइन् । घर नक्साको निर्माण सम्पन्न लिन अनिवार्य रूपमा रुख रोपी संरक्षण गरेको प्रतिवेदन संलग्न गर्नुपर्ने उनले जनाइन् । यस्तै एक वडा एक पार्क निर्माणको नीतिलाई निरन्तरता दिइने दाहालले बताइन् ।
कृषि क्षेत्रका लागि १३ करोड रूपैयाँ छुट्याएको भन्दै उनले कृषि प्रविधि प्रसार कार्यक्रम गर्ने विषय समावेश गरिएको जानकारी दिइन् । विदेशबाट फर्किएकालाई व्यवसायिक कृषि तथा पशुपालनमा प्रोत्साहन गर्ने महानगरको नीति छ ।
-1732356162.jpg)
-1732355493.jpg)
-1732343317.jpg)
