अनलाइनबाट मतदानको व्यवस्था गर्न आवश्यक: उपसभामुख इन्दिरा राना

राजनीति

गृहपृष्ठ
राजनीति

अनलाइनबाट मतदानको व्यवस्था गर्न आवश्यक: उपसभामुख इन्दिरा राना

choicekhabar बुधबार, असार १२, २०८१

प्रतिनिधिसभाकी उपसभामुख इन्दिरा रानाले नेपाली नागरिकहरूको बाहुल्यता भएका देशहरूमा अनलाइनबाट मतदानको व्यवस्था गर्न आवश्यक रहेको बताएकी छन् ।

बुधबार काठमाडौंमा आयोजित एकीकृत मस्यौदा ऐनको विषयमा अन्तरक्रिया कार्यक्रममा बोल्दै उपसभामुख घिमिरेले विदेशमा रहेका नेपालीहरूको मतदानको सुनिश्चितताका लागि गर्न अनलाइन भोटिङको प्रबन्ध गर्नुपर्ने बताइन् ।

उनले भनिन्, ‘एनआरएनएसँग राजनीति र प्रशासनिक सम्बन्ध कुनै छैन । तर, वैदेशिक रोजगारीमा गई रेमिटेन्स पठाउने नागरिकका लागि अनलाइन भोटिङको व्यवस्था गर्न आवश्यकता छ । काम गर्नका लागि विदेश गएका नेपाली नागरिकहरूको बाहुल्यता भएका ठाउँहरूमा अनलाइन भोटिङ स्टेसन निर्माण गर्नुपर्छ ।’

त्यस्तै, उपसभामुख रानाले नेपालमा पुरुषको तुलनामा महिलाको जनसङ्ख्या धेरै भए पनि महिलाले आफ्नो अधिकारको लागि लडिरहनुपरेको बताइन् । महिला, जनजातिको बाहुल्यता भएको क्षेत्रमा महिलालाई नै अगाडि सारेर अगाडि बढ्नुपर्ने उनको भनाई छ ।

‘नेपालमा पुरुषभन्दा महिलाको जनसङ्ख्या धेरै भए पनि आफ्नो अधिकारको लागि अझै लड्नुपर्ने आवश्यकता रहेको छ । महिला, जनजातिको बाहुल्यता भएको क्षेत्रमा महिलालाई नै अगाडि सार्न अगाडि बढौँ । जुन क्षेत्रमा जसको बाहुल्यता छ उसलाई नै अगाडि सार्ने हो,’ उनले भनिन्,‘मधेस भनेको छ, यादव र साहले मात्र नेतृत्व गरेको छ । मधेसमा दलित र सिमान्तकृत नागरिक पनि त छन् नि । निर्वाचन आयोगले कलस्टरमा राख्दाखेरि त्यो कुरा पनि त राख्नुहुन्छ होला नि । नेतृत्व तहमा भौगोलिक समावेशितामा आवश्यक छ । एकीकृत कानुनमा सबैको समान प्रतिनिधित्व गरिनुपर्छ ।’

प्रकाशित मिति: बुधबार, असार १२, २०८१ १३:४२

प्रतिक्रिया दिनुहोस्