रुसी सेनामा भर्ती भई युक्रेनसँगको युद्धमा थप दस नेपालीको मृत्यु

समाचार

गृहपृष्ठ
समाचार

रुसी सेनामा भर्ती भई युक्रेनसँगको युद्धमा थप दस नेपालीको मृत्यु

choicekhabar शनिबार, असार १५, २०८१

रुसी सेनामा भर्ती भई युक्रेनसँगको युद्धमा परेर थप १० नेपालीको मृत्यु भएको छ । मस्कोस्थित नेपाली दूतावासले जनाएअनुसार पछिल्लो पटक १० जनाको मृत्यू भएको हो । योसँगै रुस युक्रेन युद्धमा ज्यान गुमाउने नेपालीको संख्या ३५ पुगेको छ । पछिल्लो तथ्यांक अनुसार मृत्यु हुनेमा रूपन्देहीका लालबहादुर बुढा, दोलखाका फुर्वा शेर्पा, स्याङ्जाका सुरज विक, धादिङका नेत्रबहादुर घर्ती, गुल्मीका शंकर दमाईंको मृत्यू भएको छ ।

यसैगरी लमजुङका साजन गुरुङ, दैलेखका तेजबहादुर शाही, सिन्धुलीका शान्तबहादुर भोलान, जिल्ला पत्ता नलागेका राजु थारू र घनश्याम परियार रहेको दूतावासले जनाएको छ । दूतावासका अनुसार युद्धमा घाइते भएर उपचाररत नेपाली ६ जना रहेका छन । सरकारी तथ्यांकअनुसार रुस–युक्रेन युद्धपछि नेपाल फर्कनेको संख्या १ सय २८ पुगेको छ । सन् २०२२ फेब्रुअरी २४ का दिन रुसले युक्रेनमाथि आक्रमण गरेपछि सुरु भएको युद्धमा रुसले गैरकानुनी रूपमा नेपालीलाई सम्झौता गर्दै भर्ती गरिरहेको छ ।

रुसी सेनामा भर्ती भएका नेपालीका बारेमा सरकारले लगातार रुस सरकारसँग बुझ्न खोज्दासमेत स्पष्ट जानकारी प्राप्त भएको छैन । नेपाल सरकारले रुसी सरकारलाई पटक–पटक गरेको आग्रह र पत्राचारका बाबजुद पनि रुसी विदेश मन्त्रालयले उक्त विषय रक्षा मन्त्रालयको भएको उल्लेख गर्दै नेपाललाई जवाफ दिइसकेको छैन ।

रुसी सेनामा भर्ती भई अहिले ६ नेपाली युक्रेनी सेनाको कब्जामा छन । यसरी कब्जामा परेका नेपालीमा बर्दियाका विवेक खत्री, काभ्रेका सिद्धार्थ ढकाल, मोरङका विकास राई, रोल्पाका प्रतीक पुन, चितवनका सुजन सुवेदी र गोरखाका ईश्वर लामिछाने छन ।

प्रकाशित मिति: शनिबार, असार १५, २०८१ ११:२८

प्रतिक्रिया दिनुहोस्