क्यानडालाई हराउँदै उरुग्वे कोपा अमेरिकामा तेस्रो स्थान हासिल

खेलकुद

गृहपृष्ठ
खेलकुद

क्यानडालाई हराउँदै उरुग्वे कोपा अमेरिकामा तेस्रो स्थान हासिल

choicekhabar आइतबार, असार ३०, २०८१

क्यानडालाई टाइब्रेकर (पेनाल्टी सुटआउटमा) हराउँदै उरुग्वेले अमेरिकामा जारी कोपा अमेरिका फूटबल प्रतियोगितामा तेस्रो स्थान हासिल गरेको छ ।

निर्धारित ९० मिनेटको खेल २–२ गोलको बराबरीमा टुंगिएपछि खेलको नतिजा पेनाल्टी टाइब्रेकरबाट लिइएको थियो । जसमा उरुग्वेले ४–३ गोलको जीत दर्ता गर्दै तेस्रो स्थान पक्का गरेको हो ।

अर्थ क्यारोलिनामा आइतवार बिहान भएको खेलमा रोड्रिगो बेन्टानकुरले आठौँ मिनेटमा गोल गर्दै उरुग्वेलाई अग्रता दिलाएका थिए । तर खेलको २२ औं मिनेटमा क्यानडाका इस्माएल कोनेले गोल गर्दै खेल बराबरीमा ल्याए ।

दोस्रो हाफको ८० औं मिनेटमा क्यानडाले अग्रता लियो । जोनाथन डेविडले गोल गर्दै जीततर्फ अग्रसर गराएका थिए । तर अतिरिक्त समयमा लुइस सुवारेजले गोल गर्दै खेल बराबरीमा ल्याएर क्यानडालाई निराश पारे ।

त्यसपछि खेल टाइबेकरमा गएको हो । टाइब्रेकरमा क्यानडाको तेस्रो प्रहारमा कोने चुके । उनको प्रहार उरुग्वेका गोलकिपर सर्जियो रोसेटले बचाए ।

उरुग्वेका लागि फेडेरिको भालभर्डे, बेन्टानकुर, जर्जियन डे आरासेटा र लुइस सुवारेजले गोल गरे । क्यानडाका पनि जोनाथन डेविड, मोइस बम्बिटो र म्याथ्यू चोइनेरले गोल गरेका थिए । तर तेस्रो प्रहारमा कोने र पाँचौमा अल्फोन्सो डेभिस चुक्दा टोलीले हार बेहोर्न पुग्यो ।

उरुग्वे सेमिफाइनलमा कोलोम्बियासँग तथा क्यानडा भने अर्जेन्टिनासँग पराजित भएका थिए ।

प्रतियोगिताको फाइनल खेल सोमवार बिहान हुँदैछ । जहाँ उपाधिका लागि साविक विजेता अर्जेन्टिना र कोलम्बिया भिड्नेछन् ।

प्रकाशित मिति: आइतबार, असार ३०, २०८१ ११:३७

प्रतिक्रिया दिनुहोस्