यी जिल्लाहरुमा भारी वर्षाको सम्भावनाः

समाचार

गृहपृष्ठ
समाचार

यी जिल्लाहरुमा भारी वर्षाको सम्भावनाः

choicekhabar सोमबार, साउन २१, २०८१

काठमाडौं । नेपालमा मंगलबार (भोलि) र बुधबार (पर्सि) पानी पार्ने मनसुन प्रणाली थप सक्रिय हुने सम्भावना छ । उक्त अवधिमा देशभर साधारणतयादेखि पूर्णतया बदली (आकाशमा बादल) रही अधिकांश स्थानमा वर्षाको सम्भावना रहेको मौसम पूर्वानुमान महाशाखाले जनाएको छ ।

मनसुनको न्यूनचापीय रेखा मंगलबारदेखि नेपालनजिक सर्ने सम्भावना छ । यो प्रणालीको प्रभावले उक्त दुई दिन नेपालमा मनसुन सक्रिय हुने सम्भावना रहेकाले सतर्कता अपनाउन महाशाखाले सचेत गराएको छ ।

“कोसी प्रदेश, वाग्मती प्रदेश, गण्डकी प्रदेश, लुम्बिनी प्रदेश र सुदूरपश्चिम प्रदेशका केही तथा कर्णाली प्रदेश र मधेस प्रदेशका थोरै स्थानहरूमा भारीदेखि धेरै भारी वर्षाको सम्भावना रहेको छ । साथै, वाग्मती प्रदेश, गण्डकी प्रदेश, लुम्बिनी प्रदेशका एक–दुई स्थानमा अति भारी वर्षाको पनि सम्भावना रहको छ,” महाशाखाले सोमबार जारी गरेको मनसुन विशेष मौसम बुलेटिनमा उल्लेख छ ।

मनसुनमा रातिको समयमा पानी पर्ने सम्भावना बढी हुन्छ । सम्भावित जोखिमप्रति सतर्कतासँगै पूर्वतयारी अपनाउन समेत महाशाखाले आग्रह गरेको छ ।

“मिति २०८१–०४–२२ गतेदेखि मिति २०८१–०४–२३ गतेसम्म भू–क्षय, बाढी, पहिरो तथा गेग्रान बहावको जोखिम रहेको र मनसुनमा रातिको समयमा पानी पर्ने सम्भावना बढी हुने गरेकोले सहरी तथा तराई क्षेत्रहरूमा डुबानको जोखिम रहेको, ठूला तथा साना नदीनाला र खोलाहरूमा पानीको सतह बढ्न सक्ने, दैनिक जनजीवन, कृषि, स्वास्थ्य, पर्यटन, सडक तथा हवाई यातायात समेत प्रभावित हुन सक्ने भएकोले आवश्यक सतर्कता तथा पूर्वतयारी अपनाउनुहुन सर्वसाधारण तथा सबै सरोकारवाला निकायहरूमा अनुरोध छ,” विशेष बुलेटिनमा उल्लेख छ ।

महाशाखाले मनसुनी वर्षाको जिल्लागत सम्भावित जोखिमको विवरण समेत सार्वजनिक गरेको छ । महाशाखाले उक्त अवधिमा ताप्लेजुङ, पाँचथर, संखुवासभा, तेह्रथुम, रसुवा, चितवन, सिन्धुपाल्चोक, धादिङ, नुवाकोट, दोलखा, म्याग्दी, बागलुङ, कास्की, पर्वत, स्याङ्जा, तनहुँ, नवलपरासी पूर्व, लमजुङ, गोरखालाई उच्च जोखिमको सूचीमा वर्गीकरण गरेको छ ।

कपिलवस्तु, रुपन्देही, पाल्पा, गुल्मी, नवलपरासी पश्चिम, दाङ, बर्दिया, प्युठान, अर्घाखाँची, कैलाली, कञ्चनपुर, डडेलधुरा, डोटी र बैतडीलाई पनि उच्च जोखिमको सूचीमा राखिएको छ ।

सूची हेर्नोस्–