प्रधानमन्त्री केपी शर्मा ओलीले ‘भ्रष्टाचार गर्दिनँ, गर्न पनि दिन्नँ’ भन्ने आफ्नो प्रतिबद्धतामा शंका नगर्न सांसदहरुलाई आग्रह गरेका छन् ।
भ्रष्टाचार निवारण ऐन २०५९ लाई संशोधन गर्न बनेको विधेयकमाथि राज्य व्यवस्था समितिमा भएको छलफलमा भाग लिँदै प्रधानमन्त्री ओलीले आफूले कहिल्यै भ्रष्टाचार नगरेको बताए । ‘कहिल्यै भ्रष्टाचार गरिनँ, गर्न इजाजत दिएको छैन । मेरो नजरभन्दा बाहिर भएको भए बेग्लै कुरा हो,’ चित्रगुप्तका पनि अगाडि जवाफ दिन तयार रहेको भन्दै उनले भने, ‘मेरो बुताभन्दा बहिर अरुले गरेको कुरा रोक्न नसकिएको होला । तर गर्न दिएको होइन ।’
छलफलमा रास्वपा सभापति रवि लामिछानेले प्रधानमन्त्रीको प्रतिबद्धता पुरानै भएको भन्दै कसरी भन्ने प्रश्न गरे । दलहरुको संलग्नता जगजाहेर रहेको भन्दै उनले सोधेका थिए, ‘यसलाई अन्त्य गर्न निरन्तरको प्रतिबद्धता पर्याप्त होला र ?
टेरामक्स, बाइडबडी, नक्कली भुटानी शरणार्थी प्रकरण, बाँसबारी, यति ओम्नी, गिरिबन्धु सबैमा राजनीतिक संलग्नताको चर्चा रहेको भन्दै उनले भने, ‘यसका बाबजुद प्रधानमन्त्रीले मसँग यो प्लान छ, जसले गर्दा सरकारमा सहभागी दलकै कुनै पनि नेताको विषय आउँदा पनि गर्न सक्ने ग्राउण्ड यो भन्ने भयो भने अझ विश्वसनीयता होला । नत्र निरन्तर चलिरहन्छ ।’
लामिछानेतर्फ संकेत गर्दै प्रधानमन्त्री ओलीले कसैको अनुहार हेरिँदैन भनेर आफूले भनिसकेको स्मरण गरे । ‘कसैको अनुहार नहेरी कडा नीति अख्तियार गर्छौं’ यो प्रचारबाजी नभई स्थितिमा सुधार ल्याउन चाहेको भन्दै उनले भने, ‘कसैप्रति स्नेहभाव न वैरभाव । यस्ता कुराबाट पृथक रहेर देशका लागि काम गर्ने हो ।’
त्यसका बाबजुद आशंका देखिएको भन्दै उनले कुनै दिन तल–माथि नहुनेमा ढुक्क हुन आग्रह गरे । ‘केही आशंका जस्तो गर्नुभएको छ, केही आधारहरु रहे होलान् । तर आजको सरकारको सम्बन्धमा शंकामुक्त भएर चल्नु भए हुन्छ’ प्रधानमन्त्री ओलीले भने, ‘एउटा पनि त्रुटि यो सरकारले गरेको पाउनुभो भने यो समितिमा बोलाउनुस् । प्रधानमन्त्री हाजिर हुन्छ, प्रधानमन्त्रीले स्पष्ट पार्छ ।’
आफ्नो नेतृत्वको सरकार गल्ती गर्न नभई देश र जनताको अवस्थामा सकारात्मक परिवर्तन ल्याउन बनेको र त्यसअनुसार नै अगाडि बढ्ने उनले बताए ।
