२७ साउन,वासिङ्टन । अमेरिकी उपराष्ट्रपति कमला ह्यारिसले अमेरिकी राष्ट्रपतिको निर्वाचनमा मिशिगन, पेन्सिलभेनिया र विस्कन्सिन गरी प्रतिस्पर्धाका हिसाबले महत्वपूर्ण मानिने तीन राज्यमा डोनाल्ड ट्रम्पलाई अग्रता दिनसक्ने शनिवार सार्वजनिक पछिल्लो सर्वेक्षणले देखाएको छ ।
७८ वर्षीय पूर्वराष्ट्रपति ट्रम्पले विगत एक वर्षमा प्राप्त गरेको उपलब्धिलाई राष्ट्रपति जो बाइडेनको प्रतिस्पर्धाबाट बाहिरिने निर्णय र ह्यारिसको अभियानमा देखिएको व्यापक सहभागिताले क्षीण बनाएको देखिएको छ ।
न्युयोर्क टाइम्स र सिएना कलेजले गरेको सर्वेक्षणमा ह्यारिसले मिशिगन, पेन्सिलभेनिया र विस्कन्सिनमा समान ५० देखि ४६ प्रतिशतको अन्तरले ट्रम्पलाई पछाडि पारेको देखाएको छ ।
अमेरिकी ‘इलेक्टोरल कलेज भोटिङ’ प्रणालीअन्तर्गत मध्यपश्चिमका यी तीन राज्यलाई कुनै पनि दलको जितका लागि महत्वपूर्ण मानिएको छ ।
यो सर्वेक्षण नतिजा ती राज्यहरूमा यस पहिलेका सर्वेक्षणबाट देखिएको नतिजाविपरीत छ । अघिल्ला सर्भेक्षणहरूले लगभग एक वर्षसम्म ट्रम्पलाई डेमोक्र्याटिक राष्ट्रपति जो बाइडनसँग समान वा थोरै अग्रता गरेको देखाएका थिए ।
बाइडेनले गत महिना (जुलाईमा) राष्ट्रपतिको दौडबाट बाहिरिँदै ५९ वर्षीया उपराष्ट्रपति ह्यारिसलाई समर्थन गरेका थिए ।
नोभेम्बर ५ मा हुने निर्वाचनअघिको करिब तीन महिनामा धेरै कुरा परिवर्तन हुन सक्छ । सर्वेक्षणले मतदाताहरूले अझै पनि अर्थव्यवस्था र आप्रवासनका प्रमुख मुद्दाहरूमा ट्रम्पलाई प्राथमिकता दिएको देखाएको छ,
यद्यपि ह्यारिसले उठाएको गर्भपतनको मुद्दाप्रति अधिकांश महिला र डेमोक्र्याटहरू सकारात्मक रहेको पाइएको छ । ८१ वर्षीय बाइडेन राष्ट्रपतिको दौडबाट पछि हटेकोमा अधिकांशले राहतको महशुस भएको विचार व्यक्त गरेका छन् ।
ह्यारिसले मिनेसोटाका गभर्नर टिम वाल्जलाई आफ्नो चुनावी जोडीको रूपमा मङ्गलवार घोषणा गरेपछि पनि डेमोक्र्याटहरू बढी उत्साहित भएको देखिन्छ ।
गत जुलाई १३ मा ट्रम्पको हत्या प्रयास र गत महिना रिपब्लिकनको सफल राष्ट्रिय सम्मेलनपछि पनि ह्यारिस र वाल्जको पक्षमा समर्थन वृद्धिले ट्रम्पलाई झकझकाएको छ ।
तर पेन्सिलभेनियामा एक महिनामै दर्ता भएका मतदातामा १० अङ्कको वृद्धि भएको टाइम्स÷सिएनाको सर्वेक्षणले देखाएको छ ।
मतदाताले ह्यारिसलाई ट्रम्पभन्दा बढी बुद्धिमान र कुशल शासन गर्ने स्वभावको नेताका रूपमा हेरेको बताएका छन् ।
ट्रम्पका प्रतिद्वन्द्वी जेडी भान्स र अन्य रिपब्लिकनहरूले ह्यारिसलाई कमजोर पार्ने उद्देश्यले विभिन्न रणनीतिक आक्रमणको प्रयास गरेका बताइएको छ ।
तर नयाँ सर्वेक्षणले वाल्जसँग मिलेर यस हप्ता स्विंग राज्यहरूमा तीव्र गतिमा प्रचार गरिरहेका डेमोक्र्याटहरूले युवा र अधिक सशक्त ह्यारिसलाई दृढतापूर्वक समर्थन गरेको देखाउँछ ।
डेमोक्र्याटहरूमध्ये मे महिनायता मध्यपूर्वका तीन राज्यमा उम्मेदवारको छनोटमा मतदाताको सन्तुष्टि २७ अङ्कले बढेको सर्वेक्षणले देखाएको छ ।
तीन महिनाअघि रिपब्लिकनहरूले उच्च स्तरको सन्तुष्टि व्यक्त गरेका थिए ।
यो पछिल्लो सर्वेक्षण प्रत्येक राज्यमा कम्तीमा ६०० मतदाताको सहभागितामा अगस्ट ५ देखि ९ सम्म गरिएको थियो ।
-1732792130.jpg)
