निजी अस्पतालहरूमा वीरगञ्ज महानगरले १० प्रतिशत निशुल्क सेवा दिन निर्देशन

समाज

गृहपृष्ठ
समाज

निजी अस्पतालहरूमा वीरगञ्ज महानगरले १० प्रतिशत निशुल्क सेवा दिन निर्देशन

choicekhabar बिहीबार, साउन ३१, २०८१

वीरगञ्ज । वीरगञ्ज महानगरपालिकाका प्रमुख राजेशमान सिंहले शिक्षा क्षेत्रमा छात्रवृत्ति कार्यक्रमको सफलतापछि अब स्वास्थ्य सेवामा सुधारको लागि पनि ठोस कदम चाल्न थालेका छन्। महानगरमा रहेका ३१ वटा निजी अस्पतालहरूलाई गरीब, विपन्न, दलित, अपाङ्ग, तथा जनजातिहरूका लागि १० प्रतिशत शैया निश्शुल्क उपलब्ध गराउन उनले पहल शुरू गरेका हुन्।

नगरप्रमुख सिंहले साउन २८ गते महानगरपालिकामा आयोजित एक भेलामा निजी अस्पतालहरूका सञ्चालक र प्रबन्धकहरूलाई १० प्रतिशत शैयासहित सम्पूर्ण स्वास्थ्य सेवा निश्शुल्क उपलब्ध गराउन आग्रह गरेका थिए। उनले सरकारी निर्देशनअनुसार अस्पतालमा उपलब्ध शैयाको १० प्रतिशत, औषधि तथा प्रयोगशाला सेवासमेत निश्शुल्क दिनुपर्नेमा जोड दिएका छन्। सिंहले वीरगञ्जका निजी अस्पतालहरूको गुणस्तर सुधार्नुपर्ने आवश्यकतामा पनि प्रकाश पारे, किनकि यहाँका बिरामीहरू अझै पनि चितवन र काठमाडौंमा रेफर भइरहेका छन्।

उनले निजी अस्पतालहरूले सेवाको नाममा बिरामीहरूमाथि आर्थिक शोषण गरिरहेको आरोप लगाउँदै, १० प्रतिशत निश्शुल्क सेवा प्रदान नगरे कारबाही गरिने चेतावनी पनि दिए। सिंहले निजी अस्पतालहरूलाई यसका लागि मापदण्ड तयार गरी महानगरलाई पेश गर्न सुझाव दिएका छन्।

यस भेलामा सहभागी अस्पताल सञ्चालकहरूले भने बिरामीहरूको सङ्ख्या न्यून रहेको बताउँदै, १० प्रतिशत निश्शुल्क सेवाको प्रावधान लागू गर्न कठिनाइ हुने उल्लेख गरे। यस विषयमा थप छलफल गर्न आगामी भदौ ६ गते दोस्रो बैठक बोलाइएको छ।

यसअघि, वीरगञ्ज महानगरपालिकाले निजी विद्यालयहरूमा १० प्रतिशत छात्रवृत्ति कार्यक्रम सफलतापूर्वक सञ्चालन गरेको थियो। यो तेस्रो वर्षसम्म चल्दै आएको कार्यक्रम अन्तर्गत, सात सयजना जेहेन्दार, अपाङ्ग, दलित, विपन्न, र आन्दोलनमा घाइते तथा शहीद परिवारका छोराछोरीलाई छात्रवृत्ति प्रदान गरिएको थियो। नगरप्रमुखका जनसम्पर्क सल्लाहकार नवराज फुयाँलका अनुसार, छात्रवृत्तिको लागि अनलाइन मार्फत फाराम भर्ने व्यवस्था गरिएको छ।

वीरगञ्ज महानगरपालिकाले शिक्षा र स्वास्थ्य क्षेत्रका यी पहलहरू मार्फत समाजका पछाडि परेका वर्गहरूलाई सशक्त बनाउन महत्वपूर्ण भूमिका खेलिरहेको छ।

प्रकाशित मिति: बिहीबार, साउन ३१, २०८१ १५:०८

प्रतिक्रिया दिनुहोस्