गढीमाई मन्दिरमा भेटी गणना सुरु, पहिलो दिन नै झण्दै चार लाख भेटी संकलन

समाचार

गृहपृष्ठ
समाचार

गढीमाई मन्दिरमा भेटी गणना सुरु, पहिलो दिन नै झण्दै चार लाख भेटी संकलन

choicekhabar मंगलबार, कात्तिक १३, २०८१

वीरगञ्ज । विश्व प्रसिद्ध गढीमाई मन्दिरमा चढाइएको भेटी गणना सुरु भएको छ । महागढीमाई नगरपालिकास्थित मन्दिर परिसरमा रहेका चार वटा दान पेटिकामध्ये सोमबार मुख्य मन्दिरमा राखिएको एउटा दान पेटिका खोलिएको छ ।

घटनास्थापनादेखि कात्तिक ११ गतेसम्म सङ्कलित भेटी गनिँदा तीन लाख ८७ हजार चार सय ७४ रुपैयाँ सङ्कलन भएको छ महागढीमाई नगरपालिकाका मेयर उपेन्द्र यादवले जानकारी दिए ।

दान पेटिकाबाट नगद भेटीका साथै नेपाली र विदेशी मुद्रा र चाँदीबाट बनेका गढीमाई देवीका पाँच जोडी आँखा पनि भेटिएका छन् । मेयर यादवका अनुसार गणना सोमबार गढीमाई विकास समितिका पदाधिकारीहरूको रोहबरमा सम्पन्न गरिएको हो ।

मेयर यादवले अन्य तीन दान पेटिकाको गणना मङ्गलवार गरिने जानकारी दिए । “मुख्य मन्दिरमा राखिएको दान पेटिकाको भेटी गनी सकेका छौँ । अन्य पेटिकामा भेटी धेरै नहुन सक्छ, सम्भवतः भोलिसम्म सबै काम पूरा हुन्छ,” उनले भने ।

गढीमाई मन्दिरमा दसैँ र तिहारको बिचमा भक्तजनहरूको भीड लाग्ने भएकाले ठूलो सङ्ख्यामा भेटी सङ्कलन हुने अनुमान गरिएको थियो । गढीमाईको मेला र विशेष पर्वहरूमा देश विदेशबाट श्रद्धालुहरूको उपस्थिति रहँदै आएको छ, जसले भेटीमा विविधता थपेको देखिन्छ ।

मेयर यादवका अनुसार दान पेटिकाबाट सङ्कलित सम्पूर्ण भेटी गढीमाई विकास समितिको कोषमा जम्मा हुनेछ । यस रकमलाई मन्दिरको संरक्षण, व्यवस्थापन र विकासका काममा खर्च गरिने योजना बनाइएको छ ।

गढीमाई मन्दिरले वर्षभर धार्मिक कार्यक्रमहरू आयोजना गर्नुका साथै विभिन्न अवसरमा दर्शनार्थीहरूलाई सेवा प्रदान गर्दै आएको छ । विशेष गरी गढीमाई मेला, जसमा लाखौँ श्रद्धालु सहभागी हुन्छन्, मन्दिरका लागि मुख्य आर्थिक स्रोतका रूपमा रहने गरेको छ ।

प्रकाशित मिति: मंगलबार, कात्तिक १३, २०८१ ११:२५

प्रतिक्रिया दिनुहोस्