भारतको एकै राष्ट्रिय निकुञ्जमा तीन दिनभित्र मरे १० वटा हात्ती

समाचार

गृहपृष्ठ
समाचार

भारतको एकै राष्ट्रिय निकुञ्जमा तीन दिनभित्र मरे १० वटा हात्ती

choicekhabar आइतबार, कात्तिक १८, २०८१

मध्य प्रदेश । भारतीय राज्य मध्य प्रदेशस्थित बान्धवगढ राष्ट्रिय निकुञ्जमा तीन दिनभित्रै दुर्लभ १० वटा हात्ती मरेका छन् ।

हात्तीको लगातार मृत्यु भइरहेपछि निकुञ्ज प्रशासनमाथि गम्भीर प्रश्न उठाइएको छ। हात्तीको मृत्युको कारण खुल्न नसक्दा अवस्था गम्भीर बनेको बीबीसीले उल्लेख गरेको छ ।

वन विभागको सुरुवाती जाँचको निष्कर्षमा कोदोमा लागेको ढुसीका कारण उत्पन्न हुने जैविक विषादी खाँदा यी हात्तीको ज्यान गएको खुलेको छ।

बान्धवगढ टाइगर रिजÞर्भका उपनिर्देशक पीके वर्माले भने, ‘अहिले हामी परीक्षण प्रतिवेदन कुरिरहेका छौँ । त्यसपछि हात्तीको मृत्युको कारण खुल्नेछ । अहिलेसम्मको अवस्था हेर्दा हात्तीले कोदो बाली खाएका थिए । त्यसैबाट हात्तीलाई विषादीको काम गरेको देखिन्छ । ’

यस घटनामा विपक्षले सरकारमाथि गम्भीर आरोप लगाउँदै यसलाई वन विभागको लापरवाहीको नतिजा भनेको छ। उता प्रदेशका मुख्यमन्त्री मोहन यादवले यस प्रकरणमा दोषीलाई कडाभन्दा कडा कारबाही गरिने बताएका छन् ।

वन विभागका अनुसार सबैभन्दा पहिले २९ अक्टोबरमा ४ वटा हात्ती मृत भेटिएका थिए । त्यसबेला अन्य ६ वटा हात्ती गम्भीर बिरामी अवस्थामा थिए । बिरामी हात्तीहरूको उपचार भइरहेको थियो । तर भोलिपल्ट मल्टिपल अर्ग्यान फेलियरका कारण अन्य चार हात्ती मरे । त्यसपछि ३१ अक्टोबरमा अरु दुई हात्तीले पनि प्राण त्यागे ।

यी सबै हात्ती निकुञ्जमा १३ वटा हात्तीका झुन्ड थिए । अब यो समूहमा बचेका तीनवटा हात्ती भने स्वस्थ छन् । भारतमा एकसाथ १० हात्तीको मृत्यु भएको यो पहिलो घटना हो । यसलाई लिएर केन्द्रस्तरसम्म गहन जाँच चलिरहेको छ ।

यसैबीच शनिवार केन्द्रीय पर्यावरण मन्त्रालयले पनि एक छानबिन समिति बनाएको छ । समाचार एजेन्सी एएनआईका अनुसार, पर्यावरण मन्त्रालयको वाइल्ड लाइफ कन्ट्रोल ब्यूरोले छानबिन समिति बनाएको हो ।

प्रकाशित मिति: आइतबार, कात्तिक १८, २०८१ १३:४८

प्रतिक्रिया दिनुहोस्