आज गुरु नानकको जन्मजयन्ती मनाइँदै

समाचार

गृहपृष्ठ
समाचार

आज गुरु नानकको जन्मजयन्ती मनाइँदै

choicekhabar शुक्रबार, कात्तिक ३०, २०८१

शीख धर्मका प्रवर्तक गुरु नानकको जन्मजयन्ती आज विभिन्न कार्यक्रम आयोजना गरी मनाइँदैछ। गुरु नानकको जन्म वि.सं. १५२६ कार्तिक शुक्ल पूर्णिमाका दिन पाकिस्तानको पञ्जाब प्रान्तमा भएको थियो। उनले शीख धर्मको पवित्र ग्रन्थ ‘गुरु ग्रन्थ साहिब’ को रचना गरेका थिए र जातिवादको अन्त्य गर्दै मानवतावादी दर्शनको शुरुआत गरेका थिए। यसै कारण प्रत्येक वर्ष कार्तिक शुक्ल पूर्णिमामा गुरु नानकको योगदानको स्मरण गर्दै उनको जन्मजयन्ती विशेष रुपमा मनाइन्छ।

यस अवसरमा पवित्रस्थल गुरुद्वारामा विशेष पूजा, धार्मिक तथा सामाजिक कार्यक्रम आयोजना गरिन्छ। गुरु नानकले समाजमा व्याप्त अन्धविश्वास, घृणा र भेदभावको अन्त्य गर्दै आपसी प्रेम र भ्रातृत्वको भावनालाई प्रबर्द्धन गर्न विनाभेदभाव निःशुल्क सामुदायिक भोजन गर्ने ‘लंगर परम्परा’को थालनी गरेका थिए। उनी निर्गुण उपासनाका पक्षपाती थिए र ‘ईश्वर एक छन्, उनी सर्वशक्तिमान् छन् र यही नै सत्य हो’ भन्नेमा विश्वास गर्थे।

वीरगञ्जका शीख धर्मावलम्बीले पनि विशेष कार्यक्रम आयोजना गरी गुरु नानकको जन्मजयन्ती मनाउँदैछन्। वीरगञ्जस्थित गुरुद्वारामा भव्य कार्यक्रमको आयोजना गरिएको छ, जहाँ धार्मिक पूजाआजा, प्रवचन र सामूहिक भोजनको व्यवस्थापन गरिएको छ। यस अवसरमा वीरगञ्जका शीख समुदायले गुरुनानकका शिक्षालाई आत्मसात् गर्दै सामाजिक सद्भाव र भाइचाराको सन्देश फैलाउने प्रयास गरिरहेका छन्।

प्रकाशित मिति: शुक्रबार, कात्तिक ३०, २०८१ १०:५८

प्रतिक्रिया दिनुहोस्