प्रमुख र प्रमुख प्रशासकीय अधिकृतबीचको वैमनश्यताका कारण पर्साको बहुदरमाई नगरपालिकाको कर्मचारीहरुले पाएन्न तलब भत्ता

समाचार

गृहपृष्ठ
समाचार

प्रमुख र प्रमुख प्रशासकीय अधिकृतबीचको वैमनश्यताका कारण पर्साको बहुदरमाई नगरपालिकाको कर्मचारीहरुले पाएन्न तलब भत्ता

choicekhabar बिहीबार, मंसिर ६, २०८१

पर्साको बहुदरमाई नगरपालिकाका कर्मचारी तथा जनप्रतिनिधिले साउन महिनादेखि तलब भत्ता नपाएको गुनासो गरेका छन् ।

चालू आर्थिक वर्षको खाता सञ्चालन नहुँदा नगरपालिकाको विकास निर्माणदेखि सुत्केरीभत्ता, दीर्घरोगीले पाउने सुविधा र विद्यार्थीले पाउने छात्रवृत्तिदेखि दैनिक खाजा खर्चसम्म सबै रोकिएको छ ।

पालिकाले असार १० गतेभित्रै पालिकाको नगरसभाबाट नीति कार्यक्रम तथा बजेट ल्याउनुपर्ने व्यवस्था भए पनि विवादका कारण बहुदरमाई नगरपालिकाले गएको कात्तिक ८ गते नगरसभाबाट पालिकाको नीति तथा कार्यक्रम र बजेट ल्याएको थियो ।

बहुदरमाई नगरपालिकाका प्रमुख सिंहासन साह तेलीले नगरसभाबाट बजेट स्वीकृत भएको झण्डै एक महिना बित्न लाग्दा पनि प्रमुख प्रशासकीय अधिकृतलाई बजेट खर्च गर्ने अधिकार प्रत्यायोजन नगर्दा जनप्रतिनिधि र कर्मचारी चार महिनादेखि तलब भत्ता तथा अन्य सुविधाबाट वञ्चित भएका हुन् ।

स्थानीय सरकार सञ्चालन ऐन अनुसार नगरसभाबाट बजेट स्वीकृत भएको सात दिनभित्र प्रमुख वा अध्यक्षले प्रमुख प्रशासकीय अधिकृतलाई बजेटको खर्च गर्ने अख्तियारी दिनुपर्ने व्यवस्था छ ।

उपमेयर सुष्माकुमारी कुशवाहाले आफूले पटक–पटक प्रमुखसँग समन्वय गर्दा पनि प्रमुख प्रशासकीय अधिकृतलाई अख्तियारी नदिँदा अहिले नगरपालिकाको कर्मचारी तलब बेतनदेखि नगरपालिकाको सम्पूर्ण आर्थिक गतिविधि ठप्प रहेको बताउनुभयो ।

पालिकामा रहेका कर्मचारी, जनप्रतिनिधि सामुदायिक विद्यालयका शिक्षक गरी झण्डै एक सय जनाभन्दा धेरै कर्मचारी तथा जनप्रतिनिधिले साउनदेखि कात्तिकसम्मको कुनै पनि तलब भत्ता, दशैँ खर्चलगायत सुविधा नपाएको गुनासो गरेका छन् ।

प्रकाशित मिति: बिहीबार, मंसिर ६, २०८१ १७:५९

प्रतिक्रिया दिनुहोस्