वीरगञ्ज । अङ्ग्रेजी नयाँ वर्ष २०२५ लाई स्वागत गर्न पर्सा जिल्लाका विभिन्न स्थानीय तहहरूले तयारी थालेका छन्। विशेष गरी ठोरी गाउँपालिकामा भारतीय र आन्तरिक पर्यटकहरूको चाप बढ्ने अनुमान गरिएको छ। ठोरी भारतका विभिन्न क्षेत्रबाट नयाँ वर्ष मनाउन आउने पर्यटकहरूको प्रमुख गन्तव्य हो।
ठोरी गाउँपालिकाका पाँच प्रमुख स्थान राईधारा, सीतागुफा, बागमोर्चामाई, शिवमन्दिर, घ्याङडाँडा लगायतका धार्मिक र ऐतिहासिक क्षेत्र पर्यटकहरूको आकर्षणका केन्द्र बनेका छन्। ठोरी गापा उपाध्यक्ष गोकुलीकुमारी रेग्मीका अनुसार पालिकाले पर्यटन प्रवद्र्धनका लागि धर्मशाला, खानेपानी, बिजुलीबत्ती, र पिकनिक स्पटमा विशेष व्यवस्था गर्दै आएको छ।
पर्यटकीय होमस्टे र धार्मिक स्थानको योगदान
मधेस प्रदेशकै पहिलो होमस्टे सुवर्णपुरमा सञ्चालनमा रहेको छ। यसले ठोरीको पर्यटन प्रवद्र्धनमा महत्त्वपूर्ण योगदान पुर्याएको छ। विशेष गरी राईधारामा पर्यटकको चाप धेरै हुने भएकाले दैनिक सरसफाइका लागि हेरालु खटाइएको उपाध्यक्ष रेग्मीले बताइन्।
अन्य स्थानमा पनि चहलपहल
पर्साको अन्य क्षेत्रहरूमा पनि पर्यटकहरूको आकर्षण बढ्दो छ। जीराभवानी, पर्सागढी, र पटेर्वासुगौलीका धार्मिक स्थलहरूमा विशेषगरी सार्वजनिक बिदाको समयमा मानिसहरूको आवागमन हुने गरेको छ। पटेर्वासुगौलीको दुग्धेश्वर महादेव मन्दिरमा मेला लाग्ने हुँदा यहाँ भारतीय पर्यटकको उल्लेख्य उपस्थिति देखिन्छ।
व्यवस्थापन र चुनौती
पर्यटन प्रवद्र्धनका लागि स्थानीय तहले विभिन्न पहल गरेका छन्, तर व्यवस्थापकीय कमजोरीका कारण चुनौतीहरू कायमै छन्। सरसफाइको अभाव, पिकनिक स्पटमा शौचालयको अभाव, र बजार टाढा भएका कारण पर्यटकहरूले असुविधा भोग्नु परेको स्थानीयहरूको गुनासो छ।
पर्सागढी नगरपालिकाका प्रमुख गोकर्ण पाठकका अनुसार कोइलाभारमाई र आमोदेवीमाईमा सरसफाइ, बिजुलीबत्ती, र शौचालयको व्यवस्था गरिएको छ। यद्यपि, थप सुधारका लागि समितिमार्फत काम भइरहेको उनले जानकारी दिए।
पर्यटन विकासको सम्भावना
भुमरीमाई (बुलबुले ताल), शिव मन्दिर, र काली मन्दिर जस्ता क्षेत्रहरू विवाहमण्डप र धर्मशालाको लागि प्रयोग गरिन्छन्। तर, शौचालय र सफाइको व्यवस्थापन कमजोर भएका कारण पर्यटकको रोजाइमा ती स्थान पर्न सकेका छैनन्। भुमरीमाई पर्यटकीय विकास समितिका अध्यक्ष कुमार बस्नेतले व्यवस्थापनका लागि आर्थिक स्रोतको अभाव भएको र पालिकासँग सहकार्य गर्न ध्यानाकर्षण गराइएको बताए।
अङ्ग्रेजी नयाँ वर्षका अवसरमा पर्यटकको चहलपहल बढ्दै गर्दा पर्साका पर्यटकीय क्षेत्रहरूलाई व्यवस्थित बनाउन स्थानीय तहहरूले थप प्रयास गर्नुपर्ने देखिन्छ।
-1735883812.jpg)
-1735622781.jpeg)
-1735385712.jpg)
