किट विश्वविद्यालयबाट निकालिएका ८३ विद्यार्थी वीरगञ्ज आइपुगे

समाज

गृहपृष्ठ
समाज

किट विश्वविद्यालयबाट निकालिएका ८३ विद्यार्थी वीरगञ्ज आइपुगे

choicekhabar बुधबार, फागुन ७, २०८१

वीरगञ्ज : भारतको ओडीशास्थित कलिंगा इन्स्टिच्युट अफ इन्डस्ट्रियल टेक्नोलोजी (किट) विश्वविद्यालयबाट अपमानपूर्वक होस्टेलबाट निकालिएका नेपाली विद्यार्थीहरू नेपाल आइपुग्न थालेका छन् ।

भुवनेश्वरबाट सोमबार हिँडेका झन्डै दुई सय भन्दा बढी विद्यार्थीमध्येको एउटा समूह सडकको बाटो हुँदै वीरगञ्जसम्म आइपुगेको हो ।

पहिलो समूहमा ८३ जना भन्दा बढी विद्यार्थी बिहान वीरगञ्ज आइपुगेको जिल्ला प्रशासन कार्यालय पर्साका सहायक प्रमुख जिल्ला अधिकारी (सहायक सिडिओ) निशान राज गौतमले जानकारी दिए ।

“थप विद्यार्थीहरू आउने क्रम जारी छ । जिल्ला प्रहरी कार्यालयसँग समन्वय गरेर उनीहरूको विवरण सङ्कलन गरेर सुरक्षित तरिकाले घरसम्म पुर्‍याउने व्यवस्था मिलाएका छौँ,” उनले भने, “विद्यार्थीहरू पर्सा वीरगञ्जसहित विभिन्न स्थान, बारा, रौतहट, मकवानपुर लगायतका स्थानका छन् ।”

वीरगञ्जको शङ्कराचार्य गेटमा आएका विद्यार्थीहरूलाई स्थानीय साउथ जोन स्कुलले व्यवस्थापन गरेको दुई वटा स्कुल बसको साहयताले सिमरा सम्म पुर्‍याइएको छ । स्कुलका सहायक प्रधानाध्यापक अशोक सङ्ग्रौलाका अनुसार, भारतबाट आइरहेको अर्को समूहका विद्यार्थीहरूलाई लिन फेरी बस पठाइने छ ।

नेपाल फर्किएका विद्यार्थीहरूले विश्वविद्यालयबाट आफूहरूमाथि अत्याचार भएको बताएका छन् । प्रकृति लम्सालको शङ्कास्पद मृत्यु पश्चात् सोको विरोध गरिरहेका विद्यार्थीहरूलाई विश्वविद्यालय प्रशासनले गुन्डा र सुरक्षागार्ड लगाएर कुटपिट गर्दै होस्टेलबाट निकालेको विद्यार्थीहरूको भनाइ छ ।

प्रकाशित मिति: बुधबार, फागुन ७, २०८१ ११:३८

प्रतिक्रिया दिनुहोस्