वीरगन्ज गोल्डकपको उपाधि पुनः पुलिसको पोल्टामा

खेलकुद

गृहपृष्ठ
खेलकुद

वीरगन्ज गोल्डकपको उपाधि पुनः पुलिसको पोल्टामा

choicekhabar शनिबार, फागुन २४, २०८१

मधेस प्रदेशकै सर्वाधिक धनराशीको ‘दोस्रो वीरगन्ज गोल्डकप फुटबल’ को उपाधि पुन नेपाल पुलिस क्लबले जितेको छ ।वीरगन्जको आदर्शनगर रंगशालामा शनिबार भएको फाइनल खेलमा टाइबेकरमा मच्छिन्द्र फुटबल क्लबलाई ३–० ले स्तब्ध पार्दै पुलिस क्लबले लगातार दोस्रो पटक वीरगन्ज गोल्डकपको उपाधि उचालेको हो ।

यसअघि गत वर्ष आयोजित ‘प्रथम वीरगन्ज गोल्डकप फुटबल’ को फाइनलमा त्रिभुवन आर्मी क्लबलाई हराउँदै पुलिसले नै उपाधि जितेको थियो ।

शनिबार भएको निर्धारित ९० मिनेटको खेल १–१ को बराबरीमा सकिएपछि खेल टाइबेकरमा धकेलिएकाृ थियो । टाइबेकरमा पुलिसका ४ मध्ये तीन खेलाडीले गोल गरे भने मच्छिन्द्रका सुरुवाती तीनै जना खेलाडीले गोल गर्न असफल भएपछि उपाधि पुुन पुलिसको पोल्टामा गयो ।

टाइबेकरमा पुलिसका कप्तान रामचन्द्र वाजी,सनिल लामा र गोलरक्षक अमित टमाटाले गोल गरे भने उज्वल राइको प्रहार गोलपोष्टको बारमाथिबाट बाहिर गएको थियो ।

टाइबेकरमा मच्छिन्द्रका विशाल तमांगले गरेको प्रहार गोलपोष्टको बार बाहिर गयो भने दिवकार चौधरीको प्रहार बारमाथिबाट बाहिर गयो । यस्तै समिराज थोकरको प्रहार पुलिसका गोलरक्षक अमित टमाटाले रोकेर असफल पारिदिएका थिए ।

त्यसअघि निर्धारित समयको खेलमा सुरु देखि नै मच्छिन्द्र पुलिसमाथि हाबी भएको थियो । खेलको १२ औं मिनेटमै मच्छिन्द्रका समिराज थोकरले गोल गर्दै आफ्नो टिमलाई सुरुवाती अग्रता दिलाएका थिए । तर खेलको ५८ औं मिनेटमै मच्छिन्द्रका उज्वल राईले दिएको सुन्दर पासलाई विकास बिकले हेड गरेर गोलमा परिणत गरेपछि खेल १–१ को बराबरीमा पुगेको थियो ।

उपाधिसंगै पुलिस क्लबले नगद ११ लाख ११ हजार रुपैयाँ र ट्रफी प्राप्त गर्यो भने उपविजेता मच्छिन्द्रले नगद ५ लाख ५५ हजार ५ सय ५५ रुपैयाँमै चित्त बुझाउनु पर्यो ।

प्रतियोगिताको सर्वोत्कृष्ट खेलाडी पुलिसका कप्तान रामचन्द्र वाजी घोषित भए । उनले इलेक्टीक स्कूट प्राप्त गरे । यस्तै प्रतियोगिताको उत्कृष्ट गोलरक्षक पुलिसकै अमित टमाटा र उत्कृष्ट प्रशिक्षक पुलिसकै चेतन घिमिरे घोषित भए । उनिहरुलाई जनही २०र२० हजार रुपैयाँ प्रदान गरियो ।

प्रतियोगिताको समापन समारोहमा प्रमुख अतिथी वीरगन्ज महानगरपालिकाका प्रमुख प्रशासकीय अधिकृत अरविन्द लाल कर्ण तथा विशिष्ट अतिथी पर्साका प्रमुख जिल्ला अधिकारी गणेश अर्याल र पर्साका प्रहरी उपरीक्षक गौतम मिश्रले उपाधि विजेता र उपविजेता टिमलाई नगदराशीको पुरस्कार सहित ट्रफी र मेडल प्रदान गरे ।

वीरगन्ज महानगरपालिकाको मुख्य प्रायोजनमा भेट्रान सिटी क्लब वीरगन्जले फागुन १७ देखि २४ गतेसम्म आयोजना गरेको प्रतियोगितामा नेपालका ७ र भारतका १ गरी कूल आठ टिम सहभागी थिए ।
रेस खबर

प्रकाशित मिति: शनिबार, फागुन २४, २०८१ १९:२१

प्रतिक्रिया दिनुहोस्