पढेलेखेकाहरूले देश बिगारेको होइन, उनीहरूको कदर भइरहेको छैन : डा. सिके राउत

समाचार

गृहपृष्ठ
समाचार

पढेलेखेकाहरूले देश बिगारेको होइन, उनीहरूको कदर भइरहेको छैन : डा. सिके राउत

choicekhabar मंगलबार, वैशाख ११, २०८१

११ बैशाख,काठमाडौँ। जनमत पार्टीका अध्यक्ष तथा प्रतिनिधि सभा सदस्य डा. सिके राउतले जुनसुकै क्षेत्रमा नेतृत्व गर्ने व्यक्तिले अध्ययनलाई महत्त्व दिनुपर्ने बताएका छन्।

कर्णाली लिट्रेचर फेस्टिभल (कर्णाली साहित्य महोत्सव) मा मंगलबार ‘नेतृत्व र पठन’ विषयक सत्रमा राउतले नेतृत्व वर्गले आफू र नागरिकका लागि ज्ञान लिन जरुरी रहेको धारणा राखेका हुन् ।

उनले नेतृत्व वर्गले सामाजिक, आर्थिक लगायत देश–विदेशको अवस्थाका बारेमा जानकार हुनुपर्ने बताए । ‘अहिले किन पढ्नुप¥यो भन्ने खालको भाष्य पैदा भइरहेको छ, तर त्यो गलत हो’, उनले भने, ‘पढ्नु एकदमै आवश्यक छ ।’

अहिलेको सूचना प्रविधिको युगमा पढ्ने प्रचलन कम भएको राउतले बताए । मानिसले बर्षमा कति किताब पढ्छ र कस्ता किताब पढ्छन् भन्ने कुराले व्यक्तित्व झल्काउने राउतको भनाइ छ । ‘म हरेक दिन पढिरहेको हुन्छु, कुनैबेला बिहान मैले दुई घण्टा पढिन भने त्यो दिन बर्बाद भएजस्तो ठान्थेँ’, राउतले भने ।

हिजोआज धेरैले ‘पढेलेखेकाहरूले देश बिगारे’ भन्ने गरेको भन्दै उनले पढेलेखेका मानिसहरूको कदर नभएको धारणा राखे । ‘पहिले गाउँघरमा पढेलेखेका मान्छे भेटिँदा सम्मान हुन्थ्यो, अहिले त आक्रोश पोखिन्छ,’ उनले भने, ‘यो देश पढेलेखेकाहरूले बिगारे भनिन्छ, यहाँ पढेलेखेका मान्छेको कदर भइरहेको छैन।’

उनले अहिलेको सरकार सांसदप्रति जिम्मेवार नभएको टिप्पणी गरे । पहिलेका तुलनामा अहिले संसदमा सैद्धान्तिक छलफलको महत्त्व घटेको पनि उनको भनाइ छ । संसदमा पनि पढेका मानिसको उपस्थितिले फरक अर्थ राख्ने गरेको अनुभव सुनाए ।

उक्त सत्रमा वक्ताका रूपमा रहेका वीरेन्द्रनगर नगरपालिकाका मेयर मोहनमाया ढकालले पछिल्लो पुस्तामा पठन र लेखन संस्कृतिको विकास गर्न आवश्यक रहेको बताइन् । अहिलेको समयमा युवाहरूले सामाजिक सञ्जालमा बढी समय दिने भएकाले पढ्ने प्रचलन घटेको उनको भनाइ छ ।

मेयर ढकालले इतिहासको बारेमा जान्न अध्ययन गर्नु अनिवार्य हुने बताइन् । ‘हामीले विद्यालय शिक्षालाई निकै महत्त्व दिएर लागिरहेका छौँ, कोही पनि विद्यालय बाहिर नरहने गरी अघि बढेका छौँ’, उनले भनिन्, ‘यसबाहेक पुस्तक अध्ययनको बानी पनि बसाल्न पठन संस्कृतिको विकास गर्नु जरुरी छ ।’

प्रकाशित मिति: मंगलबार, वैशाख ११, २०८१ १६:३२

प्रतिक्रिया दिनुहोस्