स्ववियु निर्वाचनः ठाकुरराम क्याम्पसमा रोकिएको मतगणना आजबाट पुनः सुरु हुदै

राजनीति

गृहपृष्ठ
राजनीति

स्ववियु निर्वाचनः ठाकुरराम क्याम्पसमा रोकिएको मतगणना आजबाट पुनः सुरु हुदै

choicekhabar बुधबार, चैत १३, २०८१

वीरगञ्ज । वीरगञ्जको ठाकुरराम बहुमुखी क्याम्पसमा रोकिएको स्ववियु निर्वाचनको मतगणना पुनः सुरु हुदैछ । जिल्ला प्रशासन कार्यालय पर्सामा बसेको बैठकले मतगणना सुचारु गर्न सहमति जुटाएको हो । आज दिउँसो १ बजेबाट मतगणना राकिएकै गणनाबाट सुरु गरिने सहमति जुटेको छ ।

क्याम्पसमा नक्कली प्रमाणपत्र र कागजातहरूको आधारमा भएको कथित फर्जी भर्नाको अनुसन्धान गर्न पाँच सदस्यीय छानबिन समिति गठन गर्ने निर्णय गरेको छ । सहायक सिडिओ सुमन कुमार कार्कीको संयोजकत्वमा पाँच सदस्यीय समिति गठन गरिएको छ, जसले फर्जी भर्नाको अनुसन्धान गरी प्रतिवेदन पेश गर्नेछ ।

तर, समाजवादी विद्यार्थी युनियनका उम्मेदवारहरूले अदालतको निर्णयपछि मात्र मतगणना हुनुपर्ने अडान लिएका छन् । नेविसंघका रमेश यादवले भने सहमति अनुसार मतगणना सुचारु हुने बताए ।

१६ वर्षपछि गत मंगलबार सम्पन्न भएको निर्वाचनको मतगणना बुधबार साँझदेखि सुरु भएको थियो । तर, मतगणनाको क्रममा एक मतपेटिकाको सिल नम्बर मुचुल्कामा उल्लेख भएको नम्बरभन्दा फरक भेटिएपछि विवाद सिर्जना भएको थियो । यसपछि बिहीबार दिउँसोदेखि मतगणना अवरुद्ध भएको छ ।

मतगणना अवरुद्ध हुनुअघि करिब १४ सय मत गणना गरिएको थियो । सार्वजनिक मत परिणाम अनुसार नेपाल विद्यार्थी समूहका राज कुमार यादव ४२० मतसहित सभापति पदमा अगाडि थिए । नेविसंघका विकास मण्डल धानुक २६१ मत र समाजवादी विद्यार्थी युनियनका हरिकिशोर यादव २२१ मतका साथ क्रमशः दोस्रो र तेस्रो स्थानमा थिए ।

सिल नम्बरमा देखिएको भिन्नतालाई लिएर समाजवादी विद्यार्थी युनियनसहित १० विद्यार्थी संगठनले धाँधली भएको आरोप लगाउँदै निर्वाचन रद्द गरी पुनः निर्वाचनको माग थिए । उनीहरूले विरोध प्रदर्शन समेत गरेका थिए ।

ठाकुरराम बहुमुखी क्याम्पसमा यस वर्षको स्ववियु निर्वाचनमा ४ हजार २९९ मत खसेको थियो ।

प्रकाशित मिति: बुधबार, चैत १३, २०८१ ११:०४

प्रतिक्रिया दिनुहोस्