वीरगगञ्जको सडक २५–२५ मिटर विस्तारको विरोधमा आज दिउसो १२ बजेसम्म बजार बन्द रहने

समाचार

गृहपृष्ठ
समाचार

वीरगगञ्जको सडक २५–२५ मिटर विस्तारको विरोधमा आज दिउसो १२ बजेसम्म बजार बन्द रहने

choicekhabar बिहीबार, चैत १४, २०८१

वीरगञ्ज। वीरगञ्जको मुख्य सडक २५–२५ मिटर विस्तारको विरोधमा उत्रिएका घरधनी र व्यवसायीहरूले चरणबद्ध आन्दोलन गर्ने घोषणा गरेका छन्। उचित मुआब्जा पाउनुपर्ने मागसहित उनीहरूले आज बजार बन्द गरेका छन्। सडक विस्तार रोक्नका लागि वीरगञ्ज युवा तथा व्यापारी सडक पीडित सङ्घर्ष समिति गठन गरिएको छ। समितिका संयोजक जवाहर प्रसाद गुप्ताका अनुसार आज बिहानदेखि दिउँसो १२ बजेसम्म वीरगञ्जको मुख्य बजार बन्द गरिएको छ।

वीरगञ्ज महानगरपालिका–९ का वडाध्यक्ष समेत रहेका गुप्ताले मुख्य सडक २५–२५ मिटर विस्तार गर्दा ऐतिहासिक सहरको अस्तित्व मेटिने खतरा रहेको बताए। “सहर नै तहसनहस हुने जोखिम छ, त्यसैले सडक विस्तार आवश्यक छैन,” उनले भने।

गुप्ताका अनुसार संघर्ष समितिले पहिलो चरणमा बजार बन्द गर्ने निर्णय गरेको छ भने आगामी दिनमा थप संघर्षका कार्यक्रमहरू घोषणा गरिने छन् । गुप्ताले सडक विस्तार गर्दा प्रभावित घरधनी र व्यवसायीलाई उचित मुआब्जा दिनुपर्ने माग राखेका छन् ।

“यदि मागलाई बेवास्ता गरियो भने चरणबद्ध आन्दोलन गर्न बाध्य हुने छौं,” उनले चेतावनी दिए, “आन्दोलनबाट उत्पन्न हुने परिस्थितिको जिम्मेवार नेपाल सरकार र वीरगञ्ज महानगरपालिका हुनेछ ।”

वीरगञ्जको मुख्य सडक विस्तारविरुद्ध घरधनीहरूले दिएको रिट निवेदन सर्वोच्च अदालतले गत फागुन २८ गते खारेज गरेपछि सडक विभागले वीरगञ्ज महानगरपालिकासँग समन्वय गरेर सडक फराकिलो गर्ने तयारी सुरु गरेको हो । विभागले वीरगञ्ज महानगरपालिकासँग समन्वय गरी नापी कार्यालय मार्फत सडक सिमाङ्कन समेत सुरु गरेको छ । साथै, सडकमा पर्ने सरकारी तथा अर्धसरकारी कार्यालयहरूलाई ठाउँसारी गर्न पत्राचार गरिएको छ।

वीरगञ्जको मुख्य सडक फराकिलो बनाउने सरकारको योजनाले सहरको विकास हुने पक्षधरहरू उत्साहित छन् भने स्थानीय घरधनी र व्यवसायीहरू विस्थापित हुने डरमा छन्। अब सरकारको निर्णयलाई संघर्ष समितिले कसरी सामना गर्छ भन्ने हेर्न बाँकी छ।

प्रकाशित मिति: बिहीबार, चैत १४, २०८१ ११:५३

प्रतिक्रिया दिनुहोस्