जीतपुरसिमरामा किसानलाई राहतः सिँचाइको विद्युत् महसुल नगरपालिकाले बेहोर्ने

समाचार

गृहपृष्ठ
समाचार

जीतपुरसिमरामा किसानलाई राहतः सिँचाइको विद्युत् महसुल नगरपालिकाले बेहोर्ने

choicekhabar बिहीबार, चैत १४, २०८१

वीरगञ्ज । जीतपुरसिमरा उपमहानगरपालिकाले कृषि क्षेत्रमा नयाँ क्रान्ति ल्याउने उद्देश्यले एक महत्वपूर्ण निर्णय गरेको छ। नगर प्रमुख राजन पौडेलको अध्यक्षतामा बसेको बैठकले किसानको सिँचाइलाई सहज बनाउन कृषि विद्युत मिटर जडान गर्ने र त्यसबाट उठ्ने सम्पूर्ण बिजुली महसुल नगरपालिकाले नै तिर्ने घोषणा गरेको छ।

उपमहानगरपालिकाले वडा नं. १७, १८, १९, २०, र २४ का कृषियोग्य जमिनमा सिँचाइका लागि कृषि विद्युत मिटर जडान गर्नेछ। यसका लागि नेपाल विद्युत प्राधिकरण र कलैया वितरण केन्द्रसँग सहकार्य भइसकेको र किसानको खेतसम्म विद्युत लाइन विस्तारको काम सम्पन्न भएको नगर प्रमुख पौडेलले जानकारी दिए।

नगरपालिकाको यो कदमले किसानहरूलाई भरपर्दो बिजुलीमार्फत सिँचाइ सुविधा उपलब्ध हुनेछ, जसले गर्दा कृषि उत्पादनमा गुणात्मक सुधार आउने अपेक्षा गरिएको छ। साथै, विद्युतको उपलब्धताले किसानहरूलाई आधुनिक कृषि प्रविधि अपनाउन पनि प्रोत्साहन मिल्ने विश्वास व्यक्त गरिएको छ।

यसअघि पनि यस्ता घोषणा भए पनि कार्यान्वयन नभएका उदाहरणहरूका कारण किसानहरूमा उत्साहसँगै केही आशंका पनि देखिएको छ। वडा नं. १७ का निवर्तमान वडाअध्यक्ष नवराज बहादुर खड्काले विगतका अनुभवहरूले गर्दा यो निर्णय कार्यान्वयन हुनेमा केही संशय रहेको बताए।

तर, नगर प्रमुख पौडेलले यसपटक यो कार्यक्रम पूर्ण रूपमा कार्यान्वयन हुनेमा जोड दिएका छन्। उनले किसानको हितलाई प्राथमिकतामा राख्दै नगरपालिका किसानको उत्पादन र जीवनस्तर सुधार गर्न प्रतिबद्ध रहेको दोहोर्याएका छन्।

जीतपुरसिमरा उपमहानगरपालिकाको यो दूरगामी निर्णयले किसानहरूलाई ठूलो राहत मिल्ने र समग्र कृषि क्षेत्रको विकासमा महत्वपूर्ण योगदान पुग्ने विश्वास लिइएको छ।

प्रकाशित मिति: बिहीबार, चैत १४, २०८१ १३:१५

प्रतिक्रिया दिनुहोस्