पत्रकार सुरेश रजकको हत्या र संचारगृहमा भएको तोडफोडको बिरोधमा पर्सामा प्रर्दशन,सञ्चारकर्मीमाथि आक्रमण नरोकिए कडा आन्दोलन गर्ने मधेश प्रदेशका अध्यक्ष बन्जाराको चेतावनी

समाचार

गृहपृष्ठ
समाचार

पत्रकार सुरेश रजकको हत्या र संचारगृहमा भएको तोडफोडको बिरोधमा पर्सामा प्रर्दशन,सञ्चारकर्मीमाथि आक्रमण नरोकिए कडा आन्दोलन गर्ने मधेश प्रदेशका अध्यक्ष बन्जाराको चेतावनी

choicekhabar शनिबार, चैत १६, २०८१

राजसंस्थाको पुनःस्थापनाको माग राख्दै भएको आन्दोलनका क्रममा सञ्चारकर्मीमाथि आक्रमण, सञ्चार गृहमा तोडफोड र आगजनीको विरोधमा पर्सामा पनि बिरोध रयाली निकालिएको छ ।

गत शुक्रबार समाचार सङ्कलन गर्ने क्रममा एभिन्यूज टेलिभिजनका पत्रकार सुरेश रजकको जलेर मृत्यु भएको घटनाले पत्रकारिता जगतलाई स्तब्ध बनाएको छ। त्यस्तै, अन्नपूर्ण मिडिया ग्रुपको भवनमा तोडफोड र आगजनी, कान्तिपुर टेलिभिजनको समाचार कक्षमा आक्रमण, तथा हिमालयन टेलिभिजनको सवारीसाधन तोडफोड गरिएको घटनाको पत्रकार महासङ्घसहित विभिन्न सञ्चार संस्थाहरूले कडा विरोध गरेका छन्।

यस घटनाको विरोधमा शनिबार वीरगन्जका पत्रकारहरू पनि आन्दोलित भएका छन्। नेपाल पत्रकार महासङ्घ पर्साका अध्यक्ष ओम प्रकाश खनालको नेतृत्वमा वीरगन्जको घण्टाघरबाट निकालिएको विरोध र्‍याली नगर परिक्रमा गर्दै कोणसभामा परिणत भएको थियो।

कोणसभालाई सम्बोधन गर्दै पत्रकार महासङ्घ मधेस प्रदेशका अध्यक्ष श्याम बञ्जाराले सञ्चारकर्मीमाथि आक्रमण र सञ्चार गृहमा तोडफोड अस्वीकार्य भएको बताएका छन्। उनले दोषीलाई अविलम्ब कानुनी कारबाहीको दायरामा ल्याउन र कडा सजाय दिन माग गर्दै भने, “नेपालका सञ्चारकर्मी यस्ता हिंसात्मक आन्दोलनको समर्थन कुनै पनि हालतमा गर्न सक्दैनन्।”

नेपाल पत्रकार महासङ्घ, नेपाल प्रेस युनियन, प्रेस चौतारी नेपाल, प्रेस सेन्टर नेपाल, समाजवादी प्रेस सङ्गठनलगायतका संस्थाहरूले घटनाको कडा भर्त्सना गर्दै स्वतन्त्र प्रेसको सम्मान गर्न, सञ्चारकर्मीको सुरक्षामा ध्यान दिन र निर्वाध समाचार सङ्कलनको वातावरण सुनिश्चित गर्न सम्बन्धित निकायलाई आग्रह गरेका छन्।

यस घटनाले मुलुकमा प्रेस स्वतन्त्रताको सुरक्षा र सञ्चारकर्मीको हक हितप्रति गम्भीर प्रश्न खडा गरेको छ। पत्रकार महासङ्घ तथा विभिन्न सञ्चार निकायहरूले सरकारले तत्काल ठोस कदम नचाले थप आन्दोलनको घोषणा गर्ने चेतावनी दिएका छन् ।