१५औं जीतपुरसिमरा गोल्डकप चैत्र २२ गते देखि सुरु हुने

खेलकुद

गृहपृष्ठ
खेलकुद

१५औं जीतपुरसिमरा गोल्डकप चैत्र २२ गते देखि सुरु हुने

choicekhabar बुधबार, चैत २०, २०८१

बारा। १५औं जितपुर सिमरा गोल्डकप आउँदो शुक्रबारदेखि सिमरा खेल मैदानमा हुने भएको छ ।

प्रतिगोगिता जीतपुरसिमरा उपमहानगरपालिकाको मुख्य सहयोगमा हुन लागेको आयोजक नव जनजागृति युवा क्लबका अध्यक्ष रामचन्द्र लामाले प्रतियोगिताबारे मंगलबार पत्रकार सम्मेलन गरी जानकारी दिएका हुन् । उनकाअनुसार सिमरा रंगशालाको फ्लड लाईटमा आयोजना हुने प्रतियोगितामा ८ टिम सहभागी हुँदै छन् । प्रतियोगिताको विजेतालाई १० लाख तथा उपविजेतालाई ५ लाख रुपैयाँ नगद र ट्रफी पुरस्कार दिइने उनले बताए । प्रतियोगिताका लागि सम्पूर्ण व्यवस्थापकीय कार्य पूरा भएकोसमेत उनले बताए ।

प्रतियोगिताको सर्वोत्कृष्ट खेलाडीलाई पुरस्कारको रुपमा एक थान विद्युतीय स्कुटर दिइनेछ । यसैगरी उत्कृष्ट प्रशिक्षक, उत्कृष्ट गोलरक्षक र उच्च गोलकर्ताहरुले समान रुपमा २५ हजारका दरले नगद तथा इमर्जिङ खेलाडीलाई १५ हजारसहित ट्रफी दिइने सिमरा रंगशालामा आयोजित पत्रकार सम्मेलनमा लामाले जानकारी दिए । प्रत्येक खेलका म्यान अफ दी म्याचले १० हजार नगदसहित ट्रफी प्राप्त गर्नेछन् ।

अरु अरु ठाउँमा ए डिभिजन क्लबहरुको खेल भइरहेकोले त्यसबाट प्रभावित भई यस वर्षको प्रतियोगिता ढिलो हुन गएको अध्यक्ष लामाले बताए । ‘समय अभाव र आर्थिक स्रोतको कमीले यस वर्षको प्रतिगोगितामा ८ वटा टिमलाई मात्र सहभागिता गराइने छ,’ उनले भने, ‘यो भन्दा पहिले १० टिम सहभागी हुँदै आएको थियो ।’

प्रतियोगितामा गत वर्षको प्रतियोगिताको साविक विजेता नेपाल पुलिस क्लबसहित मच्छिन्द्र फुटबल क्लब, फ्रेण्ड्स क्लब, हिमालयन शेर्पा क्लब, भरतपुर फुटबल क्लब चितवन, सलहेश युवा क्लब सिराहा, मकवानपुर जिल्ला फुटबल संघ हेटौंडा र आयोजक नव जनजागृति युवा क्लब सिमराको सहभागिता रहनेछ ।

प्रकाशित मिति: बुधबार, चैत २०, २०८१ ११:२८

प्रतिक्रिया दिनुहोस्