कुलमान घिसिङको रिटमा आज पनि सुनुवाइ

समाचार

गृहपृष्ठ
समाचार

कुलमान घिसिङको रिटमा आज पनि सुनुवाइ

choicekhabar बुधबार, चैत २०, २०८१

काठमाडौं। नेपाल विद्युत प्राधिकरणको कार्यकारी निर्देशक पदबाट बर्खास्त भएका कुलमान घिसिङको रिटमाथि आज पनि सुनुवाइ हुने भएको छ। मंगलबार न्यायाधीश डा.कुमार चुडाल र नित्यानन्द पाण्डेयको इजलासमा बहस नसकिएपछि रिट हेर्दाहेर्दैमा राखिएको थियो।

यसअघि चैत्र १५ गते सर्वोच्चले उक्त रिटमाथि प्रारम्भिक सुनुवाइ गर्दै घिसिङलाई बर्खास्त गर्नुपर्ने कारण सरकारलाई सोध्दै दुवै पक्षलाई छलफलका लागि चैत्र १७ गते बोलाएको थियो। तर, सो दिन रिट हेर्न नमिल्ने सूचीमा राखिएको थियो।

न्यायाधीश अव्दुलअजीज मुसलमानको एकल इजलासले घिसिङलाई बर्खास्त गर्नुपर्ने कारण सरकारलाई सोधेको थियो। गत सोमबार मन्त्रिपरिषद बैठकले घिसिङलाई कार्यकारी निर्देशकबाट बर्खास्त गरेर हितेन्द्रदेव शाक्यलाई नियुक्त गरेपछि घिसिङ सर्वोच्च पुगेका थिए।

आफूलाई हटाउने सरकारको निर्णयविरुद्ध अन्तरिम आदेशको माग गर्दै घिसिङले सर्वोच्चमा रिट दायर गरेका थिए। यसैगरी चार वर्षअघि २०७८ साल साउन ३२ गते विदयुत प्राधिकरणका कार्यकारी निर्देशक घिसिङको नियुक्ति खारेजको माग गर्दै शाक्यले सर्वोच्चमा रिट दिएका थिए।

त्यतिबेला सरकारले तत्कालीन प्राधिकरणका कार्यकारी निर्देशक शाक्यलाई जल तथा ऊर्जा आयोगको उर्जा विशेषज्ञ सदस्य पदमा नियुक्त गरी घिसिङलाई प्राधिकरणको कार्यकारी निर्देशक बनाएको थियो।

उनले गैरकानुनीरुपमा आफूलाई बर्खास्त गरी घिसिङलाई कार्यकारी बनाएको दावी गर्दै त्यसलाई बदर गरी आफूलाई यथावत राख्नुपर्ने माग गरेका थिए। तर, सरकारले उक्त मुद्दाको टुंगो नलाग्दै शाक्यलाई पुनः कार्यकारी निर्देशकमा नियुक्त गरेको छ।

शाक्यको नियुक्ति बदरको माग गर्दै घिसिङ अदालत पुगेपछि शाक्यले आफूले दायर गरेको रिटमा निर्णय नभएकाले हालको घिसिङको रिटमा सुनुवाइ गर्न नमिल्ने जिकिर गरेका छन्।

प्रकाशित मिति: बुधबार, चैत २०, २०८१ १२:५१

प्रतिक्रिया दिनुहोस्