वीरगञ्ज– बाराको कलैयामा बुधबार पत्रकार आचारसंहिता पालना सम्बन्धी गोष्ठी कार्यक्रम सम्पन्न भएको छ । नेपाल पत्रकार महासंघको सभा हलमा सो कार्यक्रम सम्पन्न भएको हो ।
कार्यक्रमका प्रमुख अतिथी मधेश प्रदेशका गृह सञ्चार तथा कानुन मन्त्री राजकुमार लेखीले आचारसंहिता पालना कार्यक्रम निक्कै गम्भीर विषय भएको बताए । उनले नेपाल पत्रकार महासंघ मधेश प्रदेशका अध्यक्ष श्याम बञ्जाराले प्रत्रकारहरुको जीवन बीमा गर्ने विषय उठाउनु भएकोमा आफ्नो गम्भीर ध्यानाकर्षण भएको र सरकारले आगामी दिनमा मधेश प्रदेशका आम सञ्चारकर्मीहरुको जीवन बीमा गर्ने प्रतिबद्धता जनाए। उनले अबको १० दिनमा आम सञ्चारकर्मीहरुको लागि केके गर्न सकिन्छ भन्ने कमिटी गठन गरेर आएको सलाह सुझाव अनुसार अगाडि बढ्ने बताए । उनले भने आउने आर्थिक वर्षमा सञ्चार क्षेत्रमा बढी भन्दा बढी रकम छुट्याएर समस्या समाधान गर्ने प्रतिबद्धता व्यक्त गरे । प्रमुख अतिथी लेखले लोक कल्याणकारी विज्ञापन र सञ्चारकर्मीहरुको लागि विभिन्न प्रशिक्षण तथा तालिमहरु राखी अगाडि बढ्ने बताए।
कार्यक्रममा नेपाल पत्रकार महासंघ मधेश प्रदेशका अध्यक्ष श्याम बञ्जाराले गृह तथा कानुन मन्त्री राजकुमार लेखीलाई पत्रकारहरुको विभिन्न समस्याहरूको बारेमा अवगत गराएका थिए । अध्यक्ष बञ्जाराले पत्रकारहरुको स्वास्थ्य बीमा गरेर मात्र नहुने भएकोले अब मधेश सरकारले पत्रकारहरुको जीवन बीमा गरेर उनीहरूको सुरक्षा गर्न जोरदार माग गरेका थिए । साथै उनले लोककल्याणकारी विज्ञापनको दायरा बढाएर पत्रकारहरुको आर्थिक समस्या समाधान गर्नमा अनुरोध गरे । उनले सबै पत्रकारहरुलाई आचारसंहिता पालना गरेर पत्रकारिता गर्न आग्रह गरे । अध्यक्ष बन्जाराले पत्रकार महासंघ मधेश प्रदेशले सधैं पत्रकारहरुको आवाजलाई जोरदारढंगले उठाउँदै आएको र आउने दिनमा पनि उठाउने प्रतिबद्धता व्यक्त गरे ।
कार्यक्रम मीडिया काउन्सिल मधेश प्रदेशको आयोजना र पत्रकार महासंघ बारा शाखाको सहकार्यमा सम्पन्न भएको थियो । कार्यक्रममा शुभकामना मन्तब्य नेपाल पत्रकार महासंघका केन्द्रीय सदस्य सीकेन्द्र पासवानले राखेका थिए । कार्यक्रममा नेपाल पत्रकार महासंघ केन्द्रीय सदस्य राकेश कर्णले सहभागीहरूलाई आचारसंहिता सम्बन्धी प्रशिक्षण गरेका थिए।
सो अवसरमा प्रदेश सभा सदस्य देवनारायण चौधरी, प्रेस चौतारीका मधेश प्रदेश इन्चार्ज अच्युत पौडेल, नेपाल पत्रकार महासंघ बाराका कार्यवाहक अध्यक्ष पनालाल दास,गणेश रिजाल, प्रेस सेन्टरका रामबाबु मेहता , प्रेस मञ्चका अनिल बर्मा लगायतले शुभकामना राखेका थिए । कार्यक्रममा विभिन्न सञ्चामाध्यममा कार्यरत सञ्चारकर्मीहरुले आ ( आफ्ना जिज्ञासाहरु राखेका थिए । कार्यक्रम मीडिया काउन्सिल मधेश प्रदेशका कार्यवाहक अध्यक्ष कैलाश दासको अध्यक्षतामा सम्पन्न भएको थियो भने कार्यक्रमको सञ्चालन नेपाल पत्रकार महासंघ मधेश प्रदेशका कोष अध्यक्ष अनिल गौरोले गरेका थिए ।
-1743506601.jpg)
