आन्दोलनरत शिक्षकहरुलाई वार्तामा आउन मन्त्रालयको आग्रह

राजनीति

गृहपृष्ठ
राजनीति

आन्दोलनरत शिक्षकहरुलाई वार्तामा आउन मन्त्रालयको आग्रह

choicekhabar बिहीबार, चैत २१, २०८१

वीरगञ्ज । शिक्षा, विज्ञान तथा प्रविधि मन्त्रालयले आन्दोलनरत शिक्षकहरूलाई वार्तामा आउन आग्रह गरेको छ। मन्त्रालयले आज एक विज्ञप्ति जारी गर्दै शिक्षा ऐन छिटो पारित गराउन माग गर्दै आन्दोलनमा उत्रिएका शिक्षक तथा कर्मचारीका प्रतिनिधिहरूलाई छलफलका लागि बोलाएको हो।

मन्त्रालयले जारी गरेको विज्ञप्तिमा शिक्षा विधेयक प्रतिनिधिसभामा पेस भई छलफलको प्रक्रियामा रहेको र उक्त विधेयक यथाशीघ्र पारित गरियोस् भन्ने शिक्षकहरूको मागप्रति गम्भीर ध्यानाकर्षण भएको उल्लेख गरिएको छ। मन्त्रालयले संसदमा विधेयक पेस हुने, छलफल हुने र स्वीकृत हुने विधायकी प्रक्रियाका कानुनी व्यवस्था रहेको स्मरण गराउँदै सरकार शिक्षक समुदायसँग विगतझैं संवाद गर्न तयार रहेको जनाएको छ।

विज्ञप्तिमा भनिएको छ, “नेपाल सरकार सधैं सान्दर्भिक छलफल गर्न र साझा धारणा निर्माण गर्न तयार छ। त्यसैले, शिक्षक तथा कर्मचारीका प्रतिनिधिहरूलाई मन्त्रालयमा हार्दिक स्वागत गर्दछौं।“

यता, नेपाल शिक्षक महासंघको अगुवाइमा देशभरका शिक्षकहरूले शिक्षा ऐन तत्काल जारी गर्नुपर्ने माग राख्दै काठमाडौंमा विरोध प्रदर्शन जारी राखेका छन्। महासंघले शिक्षा ऐनको प्रक्रियामा ढिलाइ हुँदा शिक्षकहरूको हक अधिकार प्रभावित भएको भन्दै तत्काल समाधानको माग गरेको छ।

शिक्षकहरूको आन्दोलनका कारण सामुदायिक विद्यालयमा पठनपाठन प्रभावित भएको छ भने शिक्षा क्षेत्रको समस्या समाधानका लागि वार्ताबाट समाधान खोज्न मन्त्रालयले आह्वान गरेको हो।

आन्दोलनरत शिक्षकहरूले मन्त्रालयको वार्ता प्रस्तावलाई स्वीकार गर्ने वा आन्दोलनलाई जारी राख्ने भन्ने विषयमा कुनै निर्णय गरेका छैनन्। मन्त्रालय र शिक्षक महासंघबीचको संवादले समस्याको समाधान निकाल्ने अपेक्षा गरिएको छ।

प्रकाशित मिति: बिहीबार, चैत २१, २०८१ १६:३२

प्रतिक्रिया दिनुहोस्