चैतेदसैँको अवसरमा आज वीरगञ्जमा डोली यात्रा निकालिदै

समाचार

गृहपृष्ठ
समाचार

चैतेदसैँको अवसरमा आज वीरगञ्जमा डोली यात्रा निकालिदै

choicekhabar शनिबार, चैत २३, २०८१

वीरगञ्ज । वीरगञ्जको प्रसिद्ध गहवामाई मन्दिरको प्रचार–प्रसार र धार्मिक पर्यटन प्रवद्र्धनका लागि आज डोली यात्रा आयोजना गरिंदैछ । चैत्र अष्टमीको अवसरमा, गहवामाई माताको नगर परिक्रमा गराउने परम्परा अनुसार आज अपरान्ह ४ बजे बाट यात्रा सुरु हुने माईस्थान मन्दिर व्यवस्थापन समितिका अध्यक्ष नरेन्द्र कुमार साहले जानकारी दिएका छन् ।

गत वर्षबाट सुरु गरिएको डोली यात्राले स्थानीय तहमा मात्र नभई क्षेत्रीय धार्मिक पर्यटनमा समेत सकारात्मक प्रभाव पारेको भन्दै यस वर्ष अझ व्यवस्थित र भव्य रूपमा यात्रा सञ्चालन गरिनेछ । साहका अनुसार, गत वर्ष झण्डै २५ हजार भक्तजनको सहभागिता रहेकोमा यसपालि ५० हजारभन्दा बढी भक्तजनको सहभागिता हुने अनुमान गरिएको छ ।

सहभागिता र निसान वितरण
यात्रामा निसान (झण्डा) बोकेर सहभागी हुन चाहने भक्तजनका लागि रु. ३०५ शुल्क तोकिएको छ, जसमा झण्डा, दोपट्टा र टोपी प्रदान गरिनेछ । समितिले यसपालि १,००० निसान वितरण गर्ने लक्ष्य राखेको छ, जसले भक्तजनहरूको सक्रियता र समर्पणमा वृद्धि हुने विश्वास गरिएको छ ।

संरचना विकास र भविष्यको सम्भावना
अध्यक्ष साहले गहवामाई मन्दिर क्षेत्रलाई धार्मिक पर्यटनको आकर्षक केन्द्रका रूपमा विकास गर्न सकिने स्पष्ट सम्भावना रहेको बताउँदै, संरचना विकास भएमा स्थानीय रोजगार, व्यापार, तथा धार्मिक चेतनाको प्रवद्र्धनमा उल्लेखनीय योगदान पुग्ने धारणा व्यक्त गर्नुभयो। मन्दिरको धर्मशाला आधुनिकीकरणको चरणमा रहेको जानकारी पनि उनले दिए ।

आर्थिक पक्ष र व्यवस्थापन
गत वर्ष पहिलोपटक गरिएको डोली यात्रा करिब ७ लाख रुपैयाँ खर्चमा सम्पन्न गरिएको थियो, जसको अधिकांश सहयोग स्थानिय दाताहरूबाट प्राप्त भएको थियो। यस वर्षको यात्रामा करिब ५ लाख रुपैयाँ खर्च हुने अनुमान गरिएको छ । धार्मिक तथा सामाजिक संस्था, प्रहरी प्रशासन, सञ्चारकर्मी, स्थानीय सरकार र जनप्रतिनिधिहरूको सहकार्यमा डोली यात्रालाई व्यवस्थित र सुरक्षित बनाउन आवश्यक सबै तयारी पूरा भएको अध्यक्ष साहले बताए ।

गहवामाई माताको डोली यात्रा केवल एक धार्मिक अनुष्ठान मात्र नभई, यो वीरगञ्ज क्षेत्रको सांस्कृतिक सम्पदा र पर्यटन सम्भावनाको उज्यालो झल्को पनि हो । यस अवसरले धार्मिक एकता, सामाजिक सद्भाव र स्थानीय पहिचानलाई बलियो बनाउने विश्वास आयोजक समितिको छ ।

प्रकाशित मिति: शनिबार, चैत २३, २०८१ ११:४३

प्रतिक्रिया दिनुहोस्