पर्सामा कटुवा पेस्तोलसहित एक जना पक्राउ

समाचार

गृहपृष्ठ
समाचार

पर्सामा कटुवा पेस्तोलसहित एक जना पक्राउ

choicekhabar बिहीबार, चैत २८, २०८१

वीरगञ्ज । जिल्ला प्रहरी कार्यालय पर्साले कटुवा पेस्तोल र गोलीसहित एक व्यक्तिलाई पक्राउ गरेको छ । पक्राउ पर्नेमा पर्साको सखुवा प्रसौनी गाउँपालिका – ६ निवासी ६० वर्षीय वीरेन्द्र यादव रहेका छन् । उनलाई मङ्गलवार राति प्रहरीले नियन्त्रणमा लिएको दाबी गरेको छ ।

जिल्ला प्रहरी कार्यालय पर्साका प्रवक्ता, प्रहरी नायव उपरीक्षक (डिएसपी) किशोर लम्सालद्वारा जारी प्रेस विज्ञप्तिअनुसार, घटना मङ्गलवार राति सखुवा प्रसौनी गाउँपालिका–६ को महुवन र एकडर्वा गाउँको चौरमा भएको हो । वीरेन्द्र यादव र उनका सहोदर भाइ ५५ वर्षीय सिकिन्द्र यादवबिच गहुँ काट्ने विषयलाई लिएर विवाद भएको थियो । उक्त विवादले उग्र रूप लिँदा दुवै जना बिच हातपात र झैझगडा भएको सूचना प्रहरीले प्राप्त गरेको थियो ।

सूचनाको आधारमा प्रहरी चौकी महुवन पर्साबाट खटिएको प्रहरी टोलीले झगडा छुट्ट्याउन जाँदा वीरेन्द्र यादवको व्यवहारमा शङ्का लागेको थियो । उनले लगाएको निलो रातो धर्का भएको ट्र्याक पाइन्टभित्र शङ्कास्पद वस्तु रहेको आशङ्कामा प्रहरीले कानुनी प्रक्रिया पूरा गरी उनको शरीर खानतलासी गरेको थियो । खानतलासीका क्रममा वीरेन्द्रको कम्मरमा बाँधिएको कालो रङ्गको बेल्टको दाहिनेपट्टि फलामले बनेको कटुवा पेस्तोल फेला परेको प्रहरीले जनाएको छ ।

उक्त पेस्तोलमा “बीएमएम केएफ ००” लेखिएको एक राउन्ड गोली लोड भएको अवस्थामा थियो भने थप तीन राउन्ड “ बीएमएम केएफ ००“ लेखिएको गोली र फलामको गोली राख्ने चाचर (म्यागजिन) समेत लुकाई छिपाइ राखिएको अवस्थामा बरामद गरिएको डिएसपी लम्सालले जानकारी दिए । प्रहरीले पेस्तोल १ थान, गोली ४ राउन्ड र चाचर १ थानसहित वीरेन्द्र यादवलाई नियन्त्रणमा लिएको उनले बताए ।

पक्राउ परेका यादवलाई इलाका प्रहरी कार्यालय पोखरिया पर्सामा राखी हातहतियार तथा खरखजाना सम्बन्धी कसुरमा थप अनुसन्धान भइरहेको डिएसपी लम्सालले बताए । पर्सा जिल्ला अदालतबाट ५ दिनको म्याद लिएर प्रहरीले अनुसन्धान अघि बढाएको छ ।

प्रकाशित मिति: बिहीबार, चैत २८, २०८१ ११:०५

प्रतिक्रिया दिनुहोस्